ღალატის ბრალდებით დაკავებული ეროვნული უშიშროების სამსახურის ყოფილი ხელმძღვანელი, გარდაცვლილები და უდიდესი ფინანსური ზარალი - როგორია ვითარება ყაზახეთში

ყაზახეთის მასშტაბით 5 969 ადამიანია დაკავებული. ამის შესახებ ინფორმაციას ქვეყნის შინაგან საქმეთა სამინისტრო ავრცელებს. ადგილობრივი მედიის ცნობით, განსაკუთრებით მძიმე დანაშაულის ჩადენაში ეჭვმიტანილი 134 ადამიანი დროებითი დაკავების იზოლატორში გადაიყვანეს.

შინაგან საქმეთა სამინისტრომ ასევე დააზუსტა უშიშროების დაღუპული თანამშრომლების რაოდენობა. სამინისტროს ცნობით, დაიღუპა 16, დაშავდა 1.3 ათასზე მეტი პოლიციელი, ეროვნული გვარდიის წევრი და სამხედრო მოსამსახურე. მანამდე, ხელისუფლება 18 დაღუპულის შესახებ იტყობინებოდა.

ქვეყნის შინაგან საქმეთა მინისტრის, ერლან ტურგუმბაევის ინფორმაციით, არეულობებთან დაკავშირებით აღძრულია 125 სისხლის სამართლის საქმე, მათ შორის ძალადობის, მკვლელობისა და ყაჩაღობის ფაქტებზე.

• მისი თქმით, 400-ზე მეტი მანქანა დაზიანდა და განადგურდა, მათგან 346 პოლიციის მანქანაა. ტურგუმბაევმა აღნიშნა, რომ გაძარცვულია 100-ზე მეტი დიდი სავაჭრო ობიექტი და ბანკი. წინასწარი ზარალი დაახლოებით 212 მილიონი დოლარია.

გარდა ამისა, ყაზახეთში ეროვნული უშიშროების სამსახურის ყოფილი ხელმძღვანელი, ღალატის ბრალდებით დააკავეს. ინფორმაციას Reuters უწყების პრესსამსახურზე დაყრდნობით ავრცელებს.

კარიმ მასიმოვის დაკავების შესახებ განცხადება ეროვნული უშიშროების კომიტეტმა გაავრცელა. კომიტეტს მასიმოვი 6 იანვრამდე ხელმძღვანელობდა.

პრეზიდენტმა ყასიმ ყომართ თოყაევმა პოსტიდან მასიმოვი მას შემდეგ გაათავისუფლა, რაც პროტესტმა მასობრივი სახე მიიღო და მთელი ქვეყანა მოიცვა.

ეროვნული უშიშროების კომიტეტმა სახელმწიფო ღალატის ფაქტზე წინასწარი მოკვლევა 6 იანვარს დაიწყო. თოყაევის ოფისის თქმით, რუსეთის პრეზიდენტ ვლადიმერ პუტინს სატელეფონო საუბრისას ქვეყანაში სიტუაციის დასტაბილურების შესახებ აცნობეს.

ორი ქვეყნის ლიდერი შეთანხმდა, რომ მალე კოლექტიური უსაფრთხოების ხელშეკრულების ორგანიზაციის ვიდეო კონფერენცია ჩაეტარებინათ.

რუსეთმა ორგანიზაციის მანდატის ფარგლებში ყაზახეთში 2500 ჯარისკაცი განათავსა.