"კალმარის თამაშების" 77 წლის მსახიობის ტრიუმფი "ოქროს გლობუსზე" - "პოპულარობა რთული ყოფილა": საინტერესო ფაქტები 2022 წლის დაჯილდოებიდან

"ოქროს გლობუსი" კინოს სამყაროში ერთ-ერთი მნიშვნელოვანი და ბევრისთვის საოცნებო ჯილდოა. დაჯილდოების ცერემონია კი ყოველ წელს პომპეზური და შთამბეჭდავია ხოლმე - კინომოყვარულები გარდა ფილმებისა, ელოდებიან წითელ ხალიჩაზე შთამბეჭდავ სამოსში გამოწყობილ საყვარელ მსახიობებს, ცერემონიას, არტისტების ამაღელვებელ სიტყვებს დაჯილდოების დროს.

თუმცა წელს კორონავირუსის პანდემიის გამო, გამარჯვებულები განსხვავებულად გამოავლინეს. ჰოლივუდის უცხოური პრესის ასოციაციამ ტრუიმფატორები ყოველგვარი ღონისძიების გარეშე დაასახელა.

• კატეგორიაში საუკეთეო ფილმი - დრამა - გაიმარჯვა კინოსურათმა "ძაღლის ძალა“/The Power of the Dog.
• საუკეთესო მხატვრული ფილმი – მიუზიკლი, ან კომედია - "ოქროს გლობუსი" გადაეცა "ვესტსაიდის ისტორია“/West Side Story.
• საუკეთესო მსახიობი ქალი მხატვრულ ფილმში - დრამა - გამარჯვებული გახდა ნიკოლ კიდმანი Being the Ricardos-ში შესრულებული როლისთვის.
• საუკეთესო მსახიობი კაცი მხატვრულ ფილმში - დრამა - გახდა უილ სმიტი King Richard-ში შესრულებული როლისთვის.

მედიის განსაკუთრებული ყურადღება მიიპყრო ნომინაციამ საუკეთესო მსახიობი სერიალში შესრულებული მეორეხარისხოვანი როლისთვის, აღნიშნულ კატეგორიაში გამარჯვება მოიპოვა პოპულარულ კორეულ სერიალ "კალმარის თამაშებში“(Squid Game) შესრულებული როლისთვის მსახიობმა ო იონგ სუმ.

77 წლის მსახიობი სერიალში მოთამაშე 001-ის როლს ასრულებს. ის "ოქროს გლობუსზე" აქამდე არასდროს ყოფილა ნომინირებული. გარდა ამისა, ის გახდა პირველი კორეელი მსახიობი "ოქროს გლობუსის" ისტორიაში, რომელმაც აღნიშნული ჯილდო მოიგო.

ო იონგ სუ 1967 წლიდან სცენაზეა. სანამ კინოსა და ტელევიზიაში გადაინაცვლებდა, თეატრის მსახიობი იყო. მონაწილეობა აქვს მიღებული 200-ზე მეტ სპექტაკლში.

სამხრეთ კორეული დისტოპიური დრამა "კალმარის თამაშები“ გახდა "ნეტფლიქსის" სერიალი, რომელიც ყველაზე მეტმა ადამიანმა ნახა.

ერთ-ერთ ინტერვიუში მსახიობმა ო იონგ სუმ ისაუბრა იმის შესახებ, თუ რამდენად შეიცვალა მისი ცხოვრება "კალმარის თამაშების“ შემდეგ.

• "ისეთი განცდა მეუფლება, თითქოს დავფრინავ, საოცრება ხდება, შემდეგ კი ვეუბნები ჩემ თავს, რომ მჭირდება დავმშვიდდე, დავალაგო ფიქრები და საკუთარ თავს დავუბრუნდე.

ბევრი ადამიანი მიკავშირდება და რადგანაც არ მყავს მენეჯერი, რომელიც დამეხმარება, ჩემი ქალიშვილი პასუხობს მათ. ჩემი ცხოვრება შეიცვალა. მაშინაც კი, როცა კაფეში, ან სადმე მივდივარ, ყველა მცნობს. პოპულარობა ცოტა რთული ყოფილა“, - ამბობს მსახიობი.