"პრობლემა თქვენი მოსაგვარებელია... მაგრამ დროულად, ვიდრე კონფლიქტად ქცეულა" - სოფო ხორგუანი სვანეთში ე.წ. მაინინგის პრობლემაზე ხელისუფლებას მიმართავს

ადამიანის უფლებათა დამცველი სოფო ხორგუანი სოციალურ ქსელში სვანეთში ე.წ. მაინინგის თემას ეხმაურება.

"რაც შეეხება მაინერებს, ელნერგიის დეფიციტს სვანეთში და პრობლემის მოგვარებას:

1. სვანეთში ყველა იურიდიულ პირს ელენერგია მიეწოდება ე.წ. სამფაზიანი სადენით, უდგას მრიცხველი და ყველა იურიდიული პირი იხდის ელენერგიის გადასახადს, ყველა;

2. კრიპტოვალუტის მწარმოებელი, მაინერები ვისაც უდგას, იმ ოჯახებს ასევე ე.წ. სამფაზიანი სადენით "ენერგოპროს" მიერ მიეწოდება ელენერგია, რომლის საფასურს არ იხდიან, რადგან არ არიან იურიდიული პირები;

3. სხვა ოჯახები, რომლებსაც ელენერგია არ მიეწოდებათ ე.წ. სამფაზიანი სადენებით, სარგებლობენ შეღავათით ჰესების ზიანის სანაცვლოდ.

გამოსავალი - კრიპტოვალუტის ყველა მწარმოებელი, როგორც სხვა მეწარმე, დარეგისტრირდეს იურიდიულ პირად და გადაიხადონ გადასახადი ისევე, როგორც იხდიან კუბდარის მცხობელები, ქუდების მქსოველები თუ სტუმრების მასპინძლები.

საქართველოს მთავრობა, საქართველოს პარლამენტი, ფინანსთა სამინისტრო / Ministry of Finance of Georgia გოჩა ენუქიძე / Gocha Enukidze, პრობლემა თქვენი მოსაგვარებელია, თუ უკეთესს გზას იპოვით, გამიხარდება. მაგრამ დროულად, ვიდრე კონფლიქტად ქცეულა. პასუხისმგებლობა თქვენზეა.

p.s. ღლიცინი კუთხურობაზე, სვანურ ხასიათზე, ხატზე დაფიცებასა და გაჭირვებაზე მარტივია", - წერს ხორგუანი.