"გარესამყაროს ვართ მოწყვეტილი, გზები გასაწმენდია" - მაღალმთიან აჭარაში თოვლის საფარმა 2 მეტრს გადააჭარბა: მოსახლეობა დახმარებას ითხოვს
აჭარაში უხვი ნალექის გამო, მაღალმთიან სოფლებსა და ბათუმში გადაადგილების პრობლემები შეიქმნა. ხულოს მუნიციპალიტეტში მცხოვრებლები აცხადებენ, რომ სოფლების უმეტესობა ნალექის გამო ჩაკეტილია, ისინი დახმარებას ითხოვენ.
"გარესამყაროს ვართ მოწყვეტილი. გზები გასაწმენდია, სასწრაფო დახმარება ვერ მოდის. ვთხოვთ ადგილობრივ მთავრობას დროულად გაწმინდონ გზები",- აცხადებენ ხულოში მცხოვრებლები.
როგორც აჭარის საავტომობილო გზების დეპარტამენტში აცხადებენ, აჭარის ყველა მუნიციპალიტეტში მძიმე ტექნიკა მობილიზებულია და აქტიურად მიმდინარეობს გზის გაწმენდითი სამუშაოები.
"დიდთოვლობის გამო აჭარის საავტომობილო გზების დეპარტამენტი საგანგებო რეჟიმში განაგრძობს მუშაობას. აჭარის ყველა მუნიციპალიტეტში მიმდინარეობს გაწმენდითი სამუშაოები. მობილიზებულია სპეციალური ტექნიკა და ადამიანური რესურსი. მაღალი ზონის სოფლებში თოვლის საფარმა 2 მეტრს გადააჭარბა. ხილვადობა შეზღუდულია და გართულებულია სამუშაოების წარმოება. აჭარის საავტომობილო გზების დეპარტამენტის ტექნიკა 24 საათიან რეჟიმში ახორციელებს ადმინისტრაციულ თემებთან დამაკავშირებელი გზების გაწმენდას",- აცხადებენ უწყებაში.
რაც შეეხება ბათუმს, მერიაში აცხადებენ, რომ ბათუმში მთელი ღამის განმავლობაში თოვლის საფარისგან იწმინდებოდა გზები. "გაწმენდითი სამუშაოები ამ დრომდე ინტენსიურად მიმდინარეობს. მობილიზებულია მერიის ყველა შესაბამისი სამსახური" - აღნიშნეს მერიაში.