ავტორი:

"მას ადგილი ან ციხეში ელოდება, ან მიწაში" - ჩეჩენი უფლებადამცველის დედის გატაცების იდუმალებით მოცული საქმე და რამზან კადიროვის კიდევ ერთი სასტიკი ქმედება

"მას ადგილი ან ციხეში ელოდება, ან მიწაში" - ჩეჩენი უფლებადამცველის დედის გატაცების იდუმალებით მოცული საქმე და რამზან კადიროვის კიდევ ერთი სასტიკი ქმედება

ჩეჩნეთის ლიდერი, რამზან კადიროვი ჩეჩენ უფლებადამცველ აბუბაქრ იანგულბაევს "თურქეთში დაგეგმილ ტერაქტში მონაწილეობაში" ადანაშაულებს. იანგულბაევის დედა, ზარემი, რამდენიმე დღის წინ, ქალაქ ნიჟნი ნოვგოროდში გაიტაცეს და ძალადობრივი გზით, სავარაუდოდ, ჩეჩნეთში ჩაიყვანეს.

"ასე მგონია, რუსეთს ორი პრეზიდენტი ჰყავს. კადიროვი მეორეა, მაგრამ პუტინის მსგავსი უფლებებით სარგებლობს..."

"არ ჩერდება და არავინ იცის, საერთოდ გაჩერდება თუ არა... არ აინტერესებს ქალი, კაცი, ბავშვი, ახალგაზრდა, მოხუცი - თუ ვინმე მის პოზიციას, შეხედულებებს არ იზიარებს, მისი მტერია და მორჩა, ან მორალურად ანადგურებს, ვიდეომიმართვაში ბოდიშს ახდევინებს, ან ფიზიკურად კლავს, აერთებს დენზე, სვამს ბოთლზე, აწამებს. ცნობილი საიდუმლო სარდაფიდან გამქრალ ადამიანებს თითქმის არავინ ეძებს", - ასე ეხმაურებიან კადიროვის ქმედებას ზარემის საქმესთან დაკავშირებით.

  • ჩეჩნეთის ლიდერის განცხადებით, აბუბაქარ იანგულბაევის დედას "ადგილი ან ციხეში ელოდება, ან მიწაში."

კადიროვი ამბობს, რომ "თურქეთში დაგეგმილ ტერაქტში სწორედ აბუბაქრი მონაწილეობდა".

მისი ოჯახის წევრების თქმით, მომხდართან დაკავშირებით, პოლიცია გამოიძახეს, მაგრამ პროკურატურამ საქმე წარმოებაში არ მიიღო, მიუხედავად იმისა, რომ ქალი ჩეჩნურ ნომრიან მანქანაში უგონო მდგომარეობაში ჩასვეს.

აბუბაქარ იანგულბაევი იურისტია და რუსეთში, კერძოდ, ჩრდილო კავკასიის განყოფილებაში "წამების საწინააღმდეგო კომიტეტში" მუშაობს. აღნიშნული ორგანიზაცია რუსეთში "უცხოეთის აგენტად" მიიჩნევა.

აბუბაქრ იანგულბაევი

  • kavkaz-uzel.eu-ს ცნობით, გატაცებული ქალის მეუღლეს, საიდ იანგულბაევს მოსამართლის სტატუსი აქვს და ხელშეუხებლობის სტატუსით სარგებლობს, ამიტომ ჩეჩენმა სამართალდამცველებმა მხოლოდ ზარემა მუსაევა "წაიყვანეს".

სოციალურ ქსელში გავრცელებული ინფორმაციით, აბუბაქარ იანგულბაევმა არაერთხელ მიიღო გაფრთხილება თავისი საქმიანობის გამო, მაგრამ არ გაითვალისწინა. ის რუსეთში "კადიროვცების" ჩეჩნებზე ნადირობის ფაქტების გარდა, აქტიურად აშუქებდა ჩეჩნეთში ადამიანის უფლების დარღვევის ფაქტებსაც, რაც კადიროვს ძალიან აღიზიანებდა.

თავად ჩეჩენი იურისტის ვარაუდით, დედამისი ჩეჩნეთში ე.წ. კრედიტების თაღლითობის საქმეზე მოწმედ წაიყვანეს. რომლის შესახებ როგორც მან, ასევე დედამისმაც არაფერი იცოდა. უფრო ადრე, გასული წლის 25 დეკემბერს, იანგულბაევმა განაცხადა, რომ მისი 37 ნათესავი ერთდროულად დააკავეს, მხოლოდ იმიტომ, რომ ის კადიროვს აკრიტიკებდა. სოციალურ ქსელებში წერენ, რომ საქმეს აშკარად ეტყობა კადიროვის ხელწერა. გატაცებული ქალის შესახებ ინფორმაცია არ აქვს მის ოჯახს. არავინ იცის, სინამდვილეში მართლა ჩეჩენეთშია, როსტოვში თუ ვოლგოგრადში.

"საშინელებას საშინელებაზე აკეთებს, მაგრამ კრიტიკისა და ლანძღვის გარდა, ვერავინ ვერაფერს აკეთებს. კიდევაც რომ გაასამართლონ, ამ ადამიანების სიცოცხლეს ვერავინ დააბრუნებს, თუმცა, ამით სხვების სიცოცხლეს მაინც ეშველება. დარწმუნებული ვარ, ათასობით ადამიანი ეყოლება მიზანში", - წერს ინტერნეტმომხმარებელი "ნასტასია კინგი".

"უკვე აღარც მაქვს იმედი, რომ ოდესმე რამე შეიცვლება. ასე მგონია, რუსეთს ორი პრეზიდენტი ჰყავს. კადიროვი მეორეა, მაგრამ პუტინის მსგავსი უფლებებით სარგებლობს", - მიაჩნია ანდრეი საჩევსკის.

"რა საშინელებეაა, როდესაც შენი საქმიანობის გამო დედაშენს აპატიმრებენ, თან აპატიმრებს ტირანი, რომელიც ზუსტად იცი, რომ თუ ვინმე ხელში ჩაიგდო, ან ხეიბარს ტოვებს ან პირდაპირ "აქრობს". შვილმა, რომელიც თავის საქმეს ემსახურება, არ იცის სად არის დედამისი, რა მდგომარეობაში... პრეზიდენტი, რომელიც ჩეჩნეთში დაშანაულებს სჩადიოდა, ამხილეს და რუსეთში მიაგნო ადამიანს დასასჯელად. ტერორისტები მეტს არაფერს აკეთებენ", - წერს თამარა შამრაი.