რა რაოდენობის რუსული ჯარი და შეიარაღებაა განთავსებული უკრაინის საზღვრებთან  - გაგზავნილია, როგორც სახმელეთო, საჰაერო და საზღვაო ნაწილები, ასევე სამედიცინო პერსონალი

უკრაინისა და რუსეთის საზღვართან უკვე კვირებია, რაც დაძაბული ვითარებაა. მართალია, რუსი პოლიტიკოსები ჯიუტად იმეორებენ, რომ ისინი არ აპირებენ უკრაინაზე თავდასხმას, თუმცა უკრაინის საზღვრებთან მობილიზებული ჰყავთ დიდი რაოდენობით ჯარი, რაც დასავლელ ანალიტიკოსებს საპირისპიროს აფიქრებინებს.

პროცესში აქტიურადაა ჩართული დასავლეთი. აშშ-ის პრეზიდენტის, ჯო ბაიდენის ერთ-ერთი ბოლო განცხადების მიხედვით, რუსეთი უკრაინაში შეჭრას თებერვალში გეგმავს და ამის შესახებ მან უკრაინის პრეზიდენტი ვლადიმირ ზელენსკი სატელეფონო საუბრის დროს გააფრთხილა.

BBC-ი აქვეყნებს მასალას, სადაც აღწერილია, თუ რა რაოდენობის ჯარი და შეიარაღება ჰყავს განთავსებული რუსეთს უკრაინის საზღვრებთან.

გამოცემა წერს, რომ რუსეთმა უკრაინის საზღვართან დაახლოებით 100 000 ჯარისკაცი გადაიყვანა, ასევე კარგად აღჭურვილი ტანკები, საბრძოლო მასალა, საჰაერო ძალები, მაგრამ უარყოფს, რომ შეჭრას გეგმავს.

მათივე ცნობით, დაახლოებით, 35 000 რუსი სამხედრო მუდმივად დგას უკრაინის ტერიტორიის სიახლოვეს. აღსანიშნავია, რომ გასულ ოთხშაბათს რუსეთის თავდაცვის სამინისტრომ გამოაქვეყნა სამხედრო ნაწილების ფოტოები, რომლებიც როსტოვში, უკრაინის საზღვართან ახლოს მიდიოდნენ, რუსული მხარის ცნობით - სასწავლო საწვრთნელ ადგილას.

• ექსპერტთა შეფასებით, უკრაინის ირგვლივ განლაგებული რუსული ჯარის რაოდენობა ქვეყნის ჩრდილოეთით, სამხრეთით და აღმოსავლეთით დაახლოებით, 100 000-ს შეადგენს.

ერთ-ერთი ინფორმაციით, რომელსაც CNN-ი ავრცელებს, უკრაინის საზღვრებთან 106 000 სახმელეთი ჯარი და 21 000 საზღვაო და საჰაერო ძალების პერსონალია განთავსებული. დიდი ბრიტანეთის პრემიერ-მინისტრ ბორის ჯონსონის თქმით, დაზვერვისგან აქვთ მკაფიო ინფორმაცია, რომ უკრაინის საზღვართან 60 რუსული საბრძოლო შენაერთია, რაც საერთო რაოდენობის დაახლოებით მესამედია.

დასავლელი ანალიტიკოსები მიუთითებენ, რომ რუსეთმა სამედიცინო პერსონალიც გადაიყვანა საზღვრისპირა ზონებში, რაც შეიძლება მიუთითებდეს თავდასხმის მზადყოფნაზე.

თანამგზავრიდან გადაღებული ფოტოები იძლევა დამატებით მინიშნებებს და ინფორმაციას რუსული ჯარის გადაადგლების და მათი რაოდენობის შესახებ (დაათვალიერეთ რუსული ჯარის გადაადგილების ამსახველი თანამგზავრიდან გადაღებული ფოტოები)

ამასთან, რამდენიმე ათასი რუსი ჯარისკაცი გადავიდა ბელარუსში და უკრაინის საზღვრის სიახლოვეს განთავსდა. რუსეთში აცხადებენ, რომ მიზანი სამხედრო წვრთნებია. უკრაინის დედაქალაქი კიევი ბელარუსის საზღვრიდან დაახლოებით, 150 კილომეტრითაა დაშორებული. გავრცელებულ ფოტოებში ჩანს სამხედრო ტექნიკა, მათ შორის ჯავშშანტექნიკა, ტანკები და სარაკეტო სისტემები.

რუსეთმა განაცხადა ბელარუსში მოწინავე Su-35 მოიერიშე თვითმფრინავების განთავსების შესახებ, ასევე საჰაერო თავდაცვის სისტემების, საბრძოლო მასალების და სამედიცინო პერსონალის განთავსებაზე.

საზღვაო შეიარაღება

რუსეთი ატარებს მსოფლიო საზღვაო წვრთნებს რომელიც თებერვლის ჩათვლით უნდა გაგრძელდეს. წვრთნებში ჩართულნი არიან:

• 140 გემი და დამხმარე გემები
• 60 თვითმფრინავი
• 10 000 პერსონალი

რუსეთი სამხედრო წვრთნებს ატარებს ატლანტის, წყნარი ოკეანის, არქტიკისა და ხმელთაშუა ზღვის წყლებში.

• ასევე დაგაინტერესებთ: ამერიკული "ჯაველინები", ბრიტანული რაკეტები, თურქული დრონები და რაც მთავარია, მოტივირებული ჯარი - უკრაინული თავდაცვა რუსეთის აგრესიის წინააღმდეგ, როგორც დავითი გოლიათთან