"ეცნობა პრესას, ტელეფონით იძლევა მითითებებს და მალე დაუბრუნდება სამუშაოს" - რას აცხადებენ ჟირინოვსკის ჯანმრთელობის მდგომარეობაზე მის პარტიაში
რუსეთის "ლიბერალ-დემოკრატიულ პარტიაში“ უარყოფენ მედიაში გავრცელებულ ინფორმაციას, რომ პარტიის ლიდერი, ვლადიმერ ჟირინოვსკი ახლობლებს ვეღარ ცნობს და მისი ჯანმრთელობის მდგომარეობა თანდათან მძიმდება, - ინფორმაციას "რია ნოვოსტი“ ავრცელებს.
"კატეგორიულად უარვყოფთ ინფორმაციას, რომ ვლადიმერ ჟირინოვსკი ახლობლებს ვეღარ ცნობს,“- აცხადებენ პარტიის პრესსამსახურში.
ოფიციალურ განცხადებაში აღნიშნულია, რომ მედიაში გავრცელებული ინფორმაცია ჟირინოვსკის ჯანმრთელობის მდგომარეობის შესახებ საგრძნობლად გაზვიადებულია და სენსაციურ ეფექტზეა ორიენტირებული. მათი მტკიცებით, პოლიტიკოსი ყოველდღიურად ეცნობა პრესას, ტელეფონით იძლევა მითითებებს და მალე დაუბრუნდება მუშაობის ჩვეულ რეჟიმს.
შეგახსენებთ, რუსეთის "ლიბერალ-დემოკრატიული პარტიის“ ლიდერი, ვლადიმერ ჟირინოვსკი კორონავირუსის "ომიკრონ“ შტამით დაინფიცირდა და 2 თებერვალს მისი ჰოსპიტალიზაცია გახდა საჭირო. ორი დღის წინ გავრცელდა ინფორმაცია, რომ ჟირინოვსკი კრიტიკულ მდგომარეობაშია და ხელოვნური სუნთქვის აპარატზე იმყოფება.