ოპოზიციონერი დეპუტატები, რომლებიც 2021 წელს პარლამენტში ყველაზე აქტიურები იყვნენ
2021 წლის საპარლამენტო სხდომები განსაკუთრებული აქტიურობით გამოირჩეოდა. ეს კი დიდწილად საპარლამენტო შემადგენლობაში ოპოზიციური პარტიების მრავალფეროვნებით იყო გამოწვეული. იყვნენ დეპუტატები, რომელთა აქტიურობისა და ინიციატივების შედეგად, არაერთი კანონპროექტი მიიღეს. თუმცა, მეორე მხრივ, არიან დეპუტატები, რომლებიც არცერთხელ გამოსულან სიტყვით, არც კითხვით მიუმართავთ და არც კანონპროექტის ინიციატორები ყოფილან.
ოფიციალური მონაცემებით, საპარლამენტო ოპოზიციაში შემავალი 5 დეპუტატი, რომელიც 2021 წელს საქართველოს მე–10 მოწვევის პარლამენტში პლენარულ სხდომებზე სიტყვით ყველაზე ხშირად გამოვიდა, არიან:
- ლევან იოსელიანი – 93 გამოსვლა
- ანა ნაცვლიშვილი – 91 გამოსვლა
- იაგო ხვიჩია – 74 გამოსვლა
- ალექსანდრე ელისაშვილი – 60 გამოსვლა
- ფრიდონ ინჯია – 57 გამოსვლა
როგორც უკვე აღვნიშნეთ, იყვნენ ისეთი დეპუტატებიც, რომლებიც გასული წლის განმავლობაში სიტყვით არც ერთ საპარლამენტო პლენარულ სხდომაზე არ გამოსულან. მათი უდიდესი ნაწილი ბლოკის "ერთიანი ნაციონალური მოძრაობა - გაერთიანებული ოპოზიცია „ძალა ერთობაშია“ წევრია. ყველაზე პასიური ოპოზიციონერი დეპუტატების ჩამონათვალი ასეთია:
- შალვა ნათელაშვილი
- ელენე ხოშტარია
- ზურაბ ჯაფარიძე
- გიორგი გოდაბრელიძე
- ლევან ვარშალომიძე
- აბდულა ისმაილოვი
- მანუჩარ კვირკველია
- ვახტანგ კიკაბიძე
- რამაზ ნიკოლაიშვილი
- კახაბერ ოქრიაშვილი
- დილარ ხაბულიანი
საინტერესოა, საქართველოს პარლამენტის რეგლამენტის 148-ე მუხლის შესაბამისად, საქართველოს პარლამენტის წევრების მიერ გაგზავნილი წერილობითი კითხვების შესახებ ინფორმაციაც. 2021 წელს გაგზავნილი წერილობით კითხვების რაოდენობით შემდეგი ოპოზიციონერი დეპუტატები ლიდერობენ:
- ლევან იოსელიანი – სულ 237 კითხვა
- ხატია დეკანოიძე – 233 კითხვა
- თეონა აქუბარდია – 152 კითხვა
- რომან გოცირიძე – 127 კითხვა
- ალექსანდრე ელისაშვილი – 112 კითხვა
გთავაზობთ იმ ოპოზიციონერ დეპუტატთა ჩამონათვალსაც, რომელთა მიერ ინიცირებული კანონპროექტებიც 2021 წელს საქართველოს მე–10 მოწვევის პარლამენტმა მიიღო.
- ალეკო ელისაშვილი - 5 კანონპროექტი
- ლევან იოსელიანი - 4 კანონპროექტი
- ფრიდონ ინჯია - 2 კანონპროექტი
- ავთანდილ ენუქიძე - 1 კანონპროექტი
- ხათუნა სამნიძე - 1 კანონპროექტი
- ბადრი ჯაფარიძე - 1 კანონპროექტი
- თეონა აქუბარდია - 1 კანონპროექტი
- სალომე სამადაშვილი - 1 კანონპროექტი
- პაატა მანჯგალაძე - 1 კანონპროექტი
სტატისტიკური მონაცემებით, თითოეული განხილული მიმართულებით ყველაზე აქტიური ოპოზიციონერი დეპუტატი ლევან იოსელიანია.
"ჩემთვის მართლაც მოულოდნელი იყო, რომ ოპოზიციური პარტიებიდან ყველაზე ხშირად გამოვსულვარ სიტყვით და წერილობითი კითხვით მიმიმართავს. მიღებული კანონპროექტების ინიციატორობითაც გამოვირჩევით მე და ალეკო ელისაშვილი. დეპუტატის მთავარი ფუნქციაც ხომ ეს არის, რომ ხალხისთვის საჭირბოროტო საკითხებზე პარლამენტში აქტიური იყოს. ჩვენ მიერ სხვადასხვა უწყებაში გაგზავნილი თითოეული კითხვა ეხება იმ საკითხებს, რომლებიც მოქალაქეებისთვის აქტუალურია. ჩვენ მიერ ინიცირებული და მიღებული კანონპროექტებიც საზოგადოებისთვის მნიშვნელოვანი გამოწვევების გადაწყვეტას ეხება. ერთ-ერთი მათგანი ნასვამი მძღოლების მიმართ სანქციების გამკაცრებას, მათ შორის, პატიმრობის შემოღებას ეხება. ამ კანონპროექტმა უკვე გამოიღო დადებითი შედეგი და სულ მალე გამოქვეყნდება ოფიციალური სტატისტიკა, რომელიც ნათლად დაგვანახებს, რომ საგზაო შემთხვევების დროს გარდაცვლილი ადამიანების რაოდენობა მნიშვნელოვნად შემცირებულია. მე ვფიქრობ, რომ პარლამენტის მთავარი ფუნქცია არის სწორედ ის, რომ ხალხის პრობლემებზე ილაპარაკოს, გაგზავნოს კითხვები მათ საჭიროებებზე და მაქსიმალურად აქტიური იყოს. ეს არის მთავარი ფუნქცია იმ მანდატისა, რომელიც ხალხმა მოგვანიჭა,“ – აღნიშნავს ლევან იოსელიანი.
აღსანიშნავია, რომ პარტიის „მოქალაქეები– ალეკო ელისაშვილი“ წევრების გარდა აქტიურობით გამოირჩეოდნენ პარტიების "გიორგი ვაშაძე-სტრატეგია აღმაშენებელი“ და "ერთიანი ნაციონალური მოძრაობა - გაერთიანებული ოპოზიცია "ძალა ერთობაშია“ წევრები.