"აქ ვარ არა ომის დასაწყებად, არამედ იმისთვის, რომ თავიდან ავიცილოთ იგი - რუსეთი თავდასხმისთვის საბაბის შექმნას ცდილობს" - ბლინკენი
აშშ-ს სახელმწიფო მდივანი ენტონი ბლინკენი გაეროს უშიშროების საბჭოზე სიტყვით გამოვიდა.
"მე დღეს აქ ვარ არა ომის დასაწყებად, არამედ მის თავიდან ასაცილებლად. ინფორმაცია, რომელიც აქ წარმოვადგინე, დასტურდება იმით, რასაც ვხედავდით ჩვენს თვალწინ თვეების განმავლობაში. და გახსოვდეთ, რომ მაშინ, როდესაც რუსეთი არაერთხელ აქილიკებდა ჩვენს გაფრთხილებებს და განგაშს, როგორც მელოდრამას და სისულელეს, ისინი სტაბილურად აგროვებენ 150 000-ზე მეტ ჯარისკაცს უკრაინის საზღვრებზე და ასევე მასიური სამხედრო თავდასხმის განხორციელების შესაძლებლობებს. ამას მხოლოდ ჩვენ არ ვხედავთ. მოკავშირეები და პარტნიორები იმავეს ხედავენ", - განაცხადა ბლინკენმა.
მან მოუწოდა რუსეთს გამოიყენოს დიპლომატია, როგორც კრიზისის გამოსავალი.
ბლინკენმა თქვა, რომ მან წერილი გაუგზავნა რუსეთის საგარეო საქმეთა მინისტრს სერგეი ლავროვს, სადაც მომავალ კვირას ევროპაში შეხვედრა შესთავაზა. მან ასევე შესთავაზა შეხვედრები ნატო-რუსეთის საბჭოს და ევროპის უსაფრთხოებისა და თანამშრომლობის ორგანიზაციას.
„ამ შეხვედრებს შეუძლია გზა გაუხსნას მთავარი ლიდერების სამიტს დეესკალაციის კონტექსტში, რათა მივაღწიოთ ურთიერთგაგებას უსაფრთხოების საკითხებზე. როგორც ჩვენი ქვეყნების წამყვან დიპლომატებს, ჩვენ გვაქვს პასუხისმგებლობა, რომ ყველა ღონე გამოვიყენოთ დიპლომატიური წარმატების მისაღწევად“, - განაცხადა მან.
აშშ-ის სახელმწიფო მდივანმა ენტონი ბლინკენმა უკრაინა-რუსეთის კრიზისს "საფრთხის მომენტი” უწოდა.
”მშვიდობისა და უსაფრთხოების ყველაზე მყისიერი საფრთხე არის რუსეთის მოსალოდნელი აგრესია უკრაინის წინააღმდეგ. ფსონები სცილდება უკრაინას. ეს არის საშიშროების მომენტი მილიონობით ადამიანის სიცოცხლისა და უსაფრთხოებისთვის, ასევე გაეროს წესდებისა და წესებზე დაფუძნებული საერთაშორისო წესრიგის დასაფუძნებლად, რომელიც ინარჩუნებს სტაბილურობას მთელ მსოფლიოში“, - აღნიშნა დიპლომატმა.
ენტონი ბლინკენის განცხადებით, რუსეთი თავდასხმისთვის საბაბის შექმნას ცდილობს.
,,ეს შეიძლება იყოს შეთხზული ე.წ. ტერორისტული აფეთქება რუსეთის შიგნით. მასობრივი საფლავის გამოგონილი აღმოჩენა, ინსცენირებული თვითმფრინავის დარტყმა მშვიდობიანი მოსახლეობის წინააღმდეგ ან ყალბი, თუნდაც ნამდვილი თავდასხმა ქიმიური იარაღის გამოყენებით”, - აღნიშნა მან.
ბლინკენის თქმით, რუსეთის ხელისუფლების უმაღლესმა წარმომადგენლებმა შესაძლოა თეატრალურად შეფუთონ კრიზისი .