თანამგზავრიდან გადაღებული ახალი ფოტოები, რომლებიც უკრაინის საზღვრებთან რუსული სამხედროების აქტივობას აჩვენებს - რა ხდება მაშინ, როცა რუსეთი დეესკალაციაზე ლაპარაკობს

აშშ-ის კოსმოსური ტექნოლოგიების კომპანიის Maxar-ის მიერ გამოქვეყნებული თანამგზავრიდან გადაღებული ახალი ფოტოები აჩვენებს, რომ უკრაინის საზღვართან რუსეთის ფართომასშტაბიანი სამხედრო აქტივობა გრძელდება, მიუხედავად რუსული მხარის ბოლოდროინდელი განცხადებებისა დეესკალაციის და ჯარის გაყვანის შესახებ.

ფოტოები თებერვლის შუა რიცხვებშია (14,15 და 16 თებერვალს) გადაღებული და ისინი ასახავს, რომ უკრაინა სამი მხრიდან გარშემორტყმული რჩება რუსული სამხედრო ტექნიკითა და ჯარით.

როგორც BBC-ი წერს, განსაკუთრებით შემაშფოთებელია ახალი საველე ჰოსპიტლის არსებობა ჩრდილო-დასავლეთ ბელარუსში, ოსიპოვიჩის სამხედრო სასწავლო ზონასთან ახლოს.

"ეს შეიძლება იყოს ნებისმიერი ფართომასშტაბიანი საველე სწავლების ლეგიტიმური ნაწილი და ასევე შეიძლება იყოს გარდაუვალი კონფლიქტისთვის სამზადისი“, - წერს გამოცემა.