რა უთხრა ჯო ბაიდენმა ვლადიმერ პუტინს უკრაინის ნატო-ში შესვლასთან დაკავშირებით - რუსეთის პრეზიდენტის განცხადება და თეთრი სახლის პასუხი
რუსეთის ფედერაციის პრეზიდენტი, ვლადიმერ პუტინი აცხადებს, რომ ის აშშ-ის პრეზდენტმა, ჯო ბაიდენმა დაარწმუნა, რომ "არ აპირებენ უკრაინის ნატო-ში მიღებას "ხვალ.". ამის შესახებ პუტინმა რუსეთის უშიშროების საბჭოს სხდომაზე განაცხადა.
"მე, აი, ჩემ კოლეგებთან ერთად სწორედ ამასთან დაკავშირებით ვსაუბრობდი. ამერიკელმა კოლეგამაც დამარწმუნა, რომ არ აპირებენ უკრაინის ნატოში მიღებას "ხვალ“. მეტიც - შესაძლოა, გარკვეული მორატორიუმი“ , - განაცხადა პუტინმა.
თუმცა, მისი თქმით, ნატო, უბრალოდ, მიიჩნევს, რომ უკრაინა ჯერ არ არის მზად ალიანსში გასაწევრიანებლად.
"ამიტომ, ჩემი პასუხი იყო მარტივი: ჩვენ მივიჩნევთ, რომ ეს არ არის ჩვენთვის დათმობაზე წასვლა. ეს არის თქვენი გეგმების რეალიზაცია. თქვენ მიგაჩნიათ, რომ აუცილებელია დაცდა და უკრაინის მომზადება ნატოში გასაწევრიანებლად. თქვენ ამ მორატორიუმს თქვენთვის აკეთებთ“, - აღნიშნა პუტინმა.
მისი თქმით, უკრაინის ნატოში მიღების შემთხვევაში, რუსეთის უსაფრთხოების საფრთხე იზრდება.
"თუკი რუსეთი შეეჯახება ასეთ საფრთხეს, როგორიც არის უკრაინის ალიანსში გაწევრიანება, ჩვენი ქვეყნის საფრთხეები მრავალგზის გაიზრდება“, - განაცხადა პუტინმა.
- პუტინის განცხადებას განცხადებითვე უპასუხეს თეთრ სახლში, სადაც ნათქვამია, რომ თეთრი სახლი უარყოფს პუტინის მიერ გაჟღერებულ ინფორმაციას.
მათივე თქმით, აშშ-ის პრეზიდენტ ჯო ბაიდენს ვლადიმერ პუტინისთვის უკრაინის ნატოში გაწევრიანების შესახებ არანაირი გარანტია, ან ვალდებულება არ მიუცია.
"არ მომხდარა რაიმე პოზიციის ცვლილება აშშ-ს ხედვაში უკრაინის ნატოში გაწევრიანების შესახებ. ალიანსი ინარჩუნებს ღია კარის პოლიტიკას“, - ნათქვამია განცხადებაში.