"არ მესმის, რის გამო ვერ ვიტანდით უკრაინას... ჩვენ ხომ ერთად ვიბრძოდით, მათ შორის ქართველებიც" - რას ამბობს რუსეთის სახალხო არტისტი უკრაინის მოვლენებზე?
რუსეთის მიერ უკრაინაში შეჭრას რუსეთის კულტურის მოღვაწეები მთელი დღის მანძილზე ეხმაურებიან. მათ შორის არის რუსეთის სახალხო არტისტი ლია ახეჯაკოვა, რომელმაც სპეციალურ მიმართვაში საქართველოც ახსენა:
ლია ახეჯაკოვა:
- მე მოვუწოდებ კულტურის მოღვაწეებს, მოვიდა დრო, როცა უნდა ვილაპარაკოთ. გამოვთქვათ ჩვენი აზრი. სხვა შესაძლებლობა ჩვენ აღარ გვექნება. ტყუილი ისე იღვრება, ისე ედება ყველაფერს, უკვე სამყაროც ვეღარ უძლებს. ყველაფერი მოვსვარეთ, დავატალახიანეთ ჩვენი სიტყვებით, ქმედებებით, კორუფციით.
და ამ ბინძური ურთიერთობებით ვართ ჩვენს მეზობლებთან, სამყაროსთან, ოკეანეებთან, ზღვებთან... უკვე რვა წელია იქ ხალხი იღუპება და ახლა უკრაინა, მათ დაესხა თავს, მაგრამ დიდი ხნით ადრე მოიგონეს მოსახლეობის დეპორტაცია და ამ დეპორტაციამ საშინელი შთაბეჭდილება მოახდინა. ჩვენ გვეჯავრებოდა უკრაინა, მე არ მესმის, რის გამო ვერ ვიტანდით უკრაინას. ჩვენ ხომ ერთად ვიბრძოდით, ყველა ჩვენ ერთად ვისხედით ბანაკებში... და სხვათა შორის ქართველებიც, რომლებთანაც ომი დავიწყეთ. ყოველ შემთხვევაში სახეში შევაფურთხეთ, როგორც კი შევძელით.
როდის დასრულდება ეს სიძულვილი?! სიძულვილი მათ მიმართ, ვინც ჩვენს გარშემო არიან. მხოლოდ ჩვენ ვართ თეთრი და ფუმფულები და ყველა ჩვენ გვჩაგრავს. როდის დასრულდება ეს. ეს ძალიან ცუდად დამთავრდება...
გუშინ ახეჯაკოვამ კიდევ ერთი მიმართვა გაავრცელა, სადაც ამბობდა, რომ რუსეთის მიერ დონბასის აღიარება წარმოუდგენელი საძაგლობა იყო.
- ჩვენ ვლადიმერ პუტინისაგან ისტორიის ახალ სახელმძღვანელოს გავეცანით, პუშილინთან (ე.წ. დონეცკის რესპუბლიკის მეთაურთან) და "მოტოროლასთან“ (ე.წ. ლუგანსკის რესპუბლიკის საველე მეთაურთან, მეტსახელად "მოტოროლა“) ერთად.
ეს მთელმა მსოფლიომაც მოისმინა. მე ვფიქრობ, რაღაც გამოუსწორებელი რამ მოხდა. ეს მთელი მსოფლიოსთვის ომის გამოცხადებას ჰგავს. დონბასის აღიარება წარმოუდგენელი საძაგლობაა. შედეგები საშინელი იქნება. როცა ქვეყნის მიზანი მოქალაქეთა კეთილდღეობა და ეკონომიკის განვითარება კი არ არის, არამედ ვიღაც სამხედროების განზრახვის შესრულება, ეს საშინელებაა.