მსოფლიო რუსული "ომის მანქანის" წინააღმდეგ - სად აეკრძალა კრემლის პროპაგანდისტულ მედიას მაუწყებლობა და რა ხდება საქართველოში: პეტიცია, რომელიც რუსული დეზინფორმაციის აკრძალვას ითხოვს
რუსულ პროპაგანდასთან ბრძოლა ახლა, რუსეთ-უკრაინის ომის პერიოდში განსაკუთრებულ მნიშვნელობას იძენს. რუსული საინფორმაციო საშუალებები რეალობასთან დაუჯერებლად აცდენილ ინფორმაციებს ავრცელებენ და სამწუხაროდ, საზოგადოების დიდ ნაწილზე, აზრის ფორმირებაზე ამა თუ იმ საკითხთან დაკავშირებით, დიდი გავლენა აქვთ.
ამიტომაც, რუსეთისთვის დაწესებული სხვადასხვა მკაცრი სანქციების გარდა, ევროპამ გადაწყვიტა ერბძოლოს რუსულ პროპაგანდასაც. აღსანიშნავია, რომ ეს ბრძოლა ახლა არ დაწყებულა და ევროპის ზოგიერთ ქვეყანაში რუსული სახელმწიფო მედიასაშუალებები აქამდეც აკრძალული იყო, ზოგან კი გამოძიება მიმდინარეობდა.
- საუბარია რუსეთის სახელმწიფო საკუთრებაში არსებულ Russia Today-სა (RT) და Sputnik-ზე.
RT არის რუსული პროპაგანდისა და დეზინფორმაციის გავრცელების მთავარი ინსტრუმენტი და შედგება ინგლისურენოვანი საინფორმაციო გამოშვებებისგან, რომელიც მსოფლიოს არაერთ ქვეყანაში მაუწყებლობს. ასევე აქვთ არხი, RT Documentary - ინგლისურ და რუსულ ენებზე.
სხვადასხვა წყაროების ინფორმაციით, კვლევები აჩვენებს, რომ RT-ისა და Sputnik-ის მთავარი რედაქტორი, მარგარიტა სიმონიანი დაკავშირებულია რუსეთის თავდაცვის სამინისტროსთან და რუსეთის სამხედრო დაზვერვასთან.
RT-ის ყველა გამოცემის საერთო ნარატივი არის სამყაროს ისე წარმოჩენა თითქოს, ყველა დემოკრატიული ქვეყანა ქაოსშია ჩაფლული, ხოლო მმართველობის რუსეთში არსებული სისტემა სტაბილურია და მას კრიზისი არ ემუქრება. ეს არის მექანიზმი, რომელიც გამოიყენება მანიპულაციისთვის, რათა შეიქმნას თანამოაზრე მაყურებელთა საზოგადოება, შედეგად კი, ხელი შეეწყოს რუსეთის საგარეო პოლიტიკის ნარატივის ფართო მასაში გავრცელებას. მათ მნიშვნელოვანი გავლენა აქვთ ადამიანების მსოფლმხედველობის ჩამოყალიბებაზე.
- რუსული პროპაგანდის წინააღმდეგ პირველი მკაცრი ნაბიჯი უკვე გადაიდგა. ევროკომისიის პრეზიდენტმა ურსულა ფონ დერ ლაიენმა განაცხადა, რომ ევროკავშირის ტერიტორიაზე რუსული პროპაგანდისტული მედიები აიკრძალება.
"რუსეთის სახელმწიფო საკუთრებაში არსებული Russia Today და Sputnik-ი და მათი შვილობილი კომპანიები ვეღარ შეძლებენ თავიანთი სიცრუის გავრცელებას პუტინის ომის გასამართლებლად. ჩვენ ვამუშავებთ ინსტრუმენტებს მათი ტოქსიკური და მავნე დეზინფორმაციის აკრძალვის მიზნით ევროპაში“, - განაცხადა მან.
აღსანიშნავია, რომ RT-ის მაუწყებლობა უკვე აკრძალულია ბალტიისპირა ორ ქვეყანაში - ლიეტუვასა და ლატვიაში, ასევე, 2021 წლის აგვისტოში ლუქსემბურმა მას მაუწყებლობის ლიცენზია შეუჩერა.
ჯერ კიდევ რუსეთ-უკრაინის ომის დაწყებამდე მედიის გერმანულმა მარეგულირებელმა RT DE-ს მაუწყებლობა აუკრძალა. აკრძალვა შეეხო ბერლინში არსებულ RT DE Productions-ის ყველა პროდუქტს.
მედიის ფრანგულმა მარეგულირებელმა გამოძიება დაიწყო RT France-თან დაკავშირებით. გამოძიება შეეხებოდა სხვადასხვა საკითხის გაშუქების მნიშვნელოვან ხარვეზებს. მათ შორის, "ყვითელი ჟილეტების" პროტესტის გაშუქებას, სიტუაციას სირიასა და ცენტრალური აფრიკის რესპუბლიკაში. ყველა აღნიშნული თემა რუსეთის სამხედრო დაზვერვის ინტერესების ფარგლებშია.
RT France-ს ადანაშაულებდნენ კოვიდ-ვაქცინებთან, პირბადეების ტარებასთან, "ლოქდაუნთან" და კორონავირუსთან დაკავშირებულ სხვა საკითხებთან მიმართებით დეზინფორმაციის გავრცელებაში. არხი საათობით პირდაპირ ეთერში ტრანსლირებდა ანტივაქსერულ საპროტესტო გამოსვლებს და ასევე დროს უთმობდა ფრანგ ანტივაქსერებს. სხვა რუსული პროპაგანდისტული მედიის მსგავსად, RT France აქვეყნებდა ნეგატიურ ინფორმაციებს "ასტრაზენეკას", "ფაიზერისა" და "მოდერნას" შესახებ, ამავდროულად კი, დადებით კონტექსტში საუბრობდა რუსულ "სპუტნიკ V"-ზე.
2021 წლის სექტემბერში RT-იმ თავის ესპანურენოვან გვერდზე გამოაქვეყნა ინფორმაცია, რომ დიდი ოცეულის ქვეყნები სავარაუდოდ, "სპუტნიკ V"-ს კორონავირუსის თავიდან ასაცილებლად საუკეთესო საშუალებად აღიარებდნენ, რის შემდეგაც, ეს საკითხიც გამოძიების საგანი გახდა. (წყარო)
- შეზღუდვები სოციალური ქსელებისგან რუსულ პროპაგანდისტულ მედიას
გარდა კონკრეტული ქვეყნებისა, რუსულ პროპაგანდისტულ მედიას შეზღუდვებს უწესებს Google-იც. როგორც Reuters-ი წერს, კომპანიამ განაცხადა, რომ დროებით აუკრძალავს რუსულ სახელმწიფო დაფინანსებაზე მყოფ მედიას, განათავსოს რეკლამა მის სერვისებზე.
მანამდე YouTube-მა დაადასტურა, რომ რუსული არხების მონეტიზაცია უკრაინაში რუსეთის მიერ წარმოებული სამხედრო ოპერაციის გამო დაბლოკა.
აქამდე რუსული მედიის მონეტიზაცია დაბლოკა ასევე კომპანია Meta-მ, რომელსაც სოციალური ქსელები Facebook-ი და Instagram-ი ეკუთვნის.
- რუსული პროპაგანდისტული მედიის აკრძალვის მოთხოვნით საქართველოში პეტიცია მომზადდა
მანიფესტზე ხელმომწერები ითხოვენ, შეწყდეს ყველა პროპაგანდისტული რუსული და პრორუსული საინფორმაციო მედიასაშუალების მაუწყებლობა საქართველოში. ინიციატორები "სტრატეგია აღმაშენებელი" და "რესპუბლიკური პარტია" არიან.
"უკრაინის წინააღმდეგ რუსეთის სამხედრო აგრესიის და პუტინის იმპერიალისტური იდეოლოგიის ერთ-ერთი მთავარი ინსტრუმენტი რუსული საინფორმაციო ომის მანქანაა.
წლების განმავლობაში საქართველოს ხელისუფლება კონკრეტულ ნაბიჯებს არ დგამდა რუსული დეზინფორმაციული და პროპაგანდისტული კამპანიის წინააღმდეგ. დღეს, უკრაინაში რუსული აგრესიის პირობებში, რუსულ დეზინფორმაციასთან ბრძოლა პირდაპირ უკავშირდება ჩვენი ქვეყნის უსაფრთხოებას და რეგიონში მშვიდობას.
იმისთვის, რომ არ მოხდეს კრემლის მხრიდან დეზინფორმაციის გავრცელება, საზოგადოებრივ აზრზე კრემლის პროპაგანდის ზემოქმედება და საზოგადოების დემორალიზაცია, დღის წესრიგში დგას საქართველოში მაუწყებლობის მქონე ყველა რუსული და პრორუსული პროპაგანდისტული საინფორმაციო არხის მაუწყებლობის შეჩერება. მივმართავთ კომუნიკაციების მარეგულირებელ კომისიას და საქართველოში მოქმედ ყველა ოპერატორს, მაუწყებლობის შესახებ საქართველოს კანონის თანახმად, უზრუნველყოს შესაბამისი არხების ჩახსნა მაუწყებლობიდან", - ვკითხულობთ გამოქვეყნებულ ინფორმაციაში.
პეტიციაზე ხელის მოსაწერად გადადით ბმულზე - manifest.ge