"საკმარისია ეს ერთი თვე გაგრძელდეს და შიმშილის პირას მივალთ" - რა ხდება აფხაზეთსა და სამაჩაბლოში, სადაც რუსეთისთვის დაწესებული სანქციების შედეგი უკვე იგრძნეს
სანქციები, რომელიც დასავლეთმა რუსეთს დაუწესა, საქართველოს ოკუპირებულ რეგიონებს, აფხაზეთსა და სამაჩაბლოსაც შეეხო იმ კუთხით, რომ სხვადასხვა პროდუქტზე ფასები მკვეთრად გაიზარდა. აფხაზეთში ადგილობრივები ამბობენ, რომ "შიმშილი გარდაუვალია."
"ჩვენ რა დავაშავეთ, როდესაც ერთ კვირაში 5 ჯერ გაძვირდა სურსათი, კატასტროფა ხდება, პურის ფასზე, შაქარზე, ზეთზე. რა ვქნათ, როგორ ვიცხოვროთ?!" - ასე ეხმიანება რუსეთის მიერ ოკუპირებული აფხაზეთის მკვიდრი, ლარისა ხაჯიმბა, რუსეთის წინააღმდეგ სანქციების ფონზე, რეგიონში ფასების მკვეთრ მატებას.
ადგილობრივების თქმით, თუ ასე გაგრძელდა, აფხაზეთში შიმშილობა გარდაუვალია, რადგან სოფლის მეურნეობა, "ფაქტობრივად, მკვდარია, თუ არ ჩავთვლით, ციტრუსს და თხილს, რომელიც გალის რაიონში იწარმოება და ღვინოს, რომელიც მცირე, თითქმის სიმბოლური რაოდენობით იბეჭდება ექსპორტისთვის", - ამბობენ ისინი.
მოსახლეობა ჰუმანიტარული კრიზისის მოლოდინში თავის "ხელმძღვანელობას" რეაგირებას სთხოვს და ვარაუდობენ, რომ "დიდი ალბათობით, რუსეთი არ აპირებს თავისი მარაგები ხელგაშლილად დაარიგოს."
"რუსეთზე მაღალი ფასებია უკვე ჩვენთან. 5-6 ჯერ მეტს ვიხდით პირველადი მოხმარების ნივთებსა და სასიცოცხლოდ მნიშვნელოვან პროდუქტებში. რაიმე მოიმოქმედეთ, თორემ მძლავრ საპროტესტო ტალღას მიიღებთ. მერე გვეძახეთ მოღალატეები. გასაგებია, რომ ბევრი რამ და მათ შორის, ტრანსპორტირება გაძვირდა, მაგრამ ადლერში 48 რუბლი ღირის ლიტრი საწვავი, ჩვენთან 56-58. ჩვენზე აკეთებთ ფულს?! ჩვენ ისევ კაპიკებზე ვმუშაობთ, ჩვენი ხელფასი წლებია ერთი და იგივეა. ჩემი ახლანდელი ხელფასით მხოლოდ ერთი კვირის სამყოფი საკვების შეძენა შეგვიძლია. მერე რა ვქნა?! და უმეტესობა ჩემ დღეშია", - წერს ადგილობრივი ფედერიკ ტანია.
"პური ისეა გაძვირებული, ფქვილის ყიდვაზე დავფიქრდით, მაგრამ ყველაზე ცუდი ის არის, დენი თითქმის არ გვაქვს, სად უნდა გამოვიცხოთ?! რომელ ერთზე ვიდარდო, არ ვიცი. საკმარისია ეს ერთი თვე გაგრძელდეს და შიმშილის პირას მივალთ", - ამბობს ირმა არძინბა.
- "ისე გაფაციცებული უყურებთ ხოლმე ჩვენს ფასებს... შეეშვით ჩვენს სამზარეულოში ქექვას, თითქოს ჩვენს ჯიბეში სხედხართ, რა რამდენი ღირს, სად რას ვჭამთ და როგორ ვცხოვრობთ. ან სად ნახეთ ჩვენთან გაიაფებული, რუსეთი ნავთობის ქვეყანაა, მაგრამ ჩვენთანაც ძვირია საწვავი და თქვენთან რატომ უნდა იყოს უფრო იაფი? მადლობის მაგივრად, მუდმივად ჩვენი ცხოვრებით, ფასების ქექვით ხართ დაკავებული. კი ხართ ღირსი, გაგრძნობინონ, სინამდვილეში სად ხართ და რასაც წარმოადგენთ", - პასუხობს აფხაზების აღშფოთებას ალიონა ივანენკო.
აფხაზები ასევე აპროტესტებენ, რომ უკრაინის ომში უკვე მონაწილეობენ მათი "სამხედროები." მათივე თქმით, ერთი ნაკადი უნდა წაიყვანეს და "ეს ბოლო ნამდვილად ვერ იქნება."
"ჯერ ზურგში არიან, მაგრამ თუ დასჭრიდათ, წინა ხაზზეც მოუწევთ წასვლა. არ შევეგუებით ამას. ჩვენი გამოუცდელი ბიჭები საზარბაზნე ხორცი არ არიან", - წერენ ადგილობრივები სოციალურ ქსელში.
იგივე სიტუაციაა ცხინვალის რეგიონში, სადაც ადგილობრივების თქმით, პირველ რიგში, პურის ფქვილი გაძვირდა. მოსახლეობა, ამბობს, რომ გარკვეული ნაწილი, პირველადი მოხმარების პროდუქტებს იმარაგებს.
"ყველას არ აქვს მარაგის გასაკეთებელი ფული და ჩვენ რა ვქნათ, ადამიანებმა რომლებიც მხოლოდ ხელფასზე ვმუშაობთ და იმდენი ფული არ გვაქვს, რომ 4-5 ტომარა ფქვილი და შაქარი ვიყიდოთ?! ისედაც უპატრონოები ვიყავით და აწი საერთოდ ვიღას ვეხსომებით?! ჩვენი ხელისუფლება კი მხოლოდ თავისი ჯიბეების გასქელებით არის დაკავებული. ის დროა, ტრადიციებს დავუბრუნდეთ, მიწა დავამუშავოთ, თორემ შიმშილით დავიხოცებით", -წერს სოციალურ ქსელში ნანა პლიევა.
"გუშინ დილით ვიყიდე პური, იმხელა რიგი იყო, მივხვდი კარგ დღეში არ ვიყავით. უკვე გაძვირებლი იყო შაქარი. კატასტროფა ხდება ბავშვის კვებაზე. ცუდ დღეში ვართ", - აღნშნავს ოლეგ ჯიოევი.