"ჩვენ და ტერორი სხვადასხვა სამყარო ვართ. ჩვენს დროშაზე სისხლი არ არის. არ არის და არც არასდროს იქნება შავი ლაქები, არც სვასტიკები" - ვოლოდიმირ ზელენსკი
"თუ არ შეუძლიათ მიჰყვნენ ცივილიზებულ წესებს, მაშინ არ უნდა მიიღონ არც პროდუქტი და არც მომსახურება, დაე, ომმა გამოკვებოთ!" - ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა.
მან მსოფლიო საზოგადოებას რუსეთთან სავაჭრო ურთიერთობების ბოიკოტირებისკენ მოუწოდა.
"ჩვენ თავს ვიცავთ რუსეთის შემოჭრისგან უკვე მეთორმეტე დღეა. ჩვენ არასდროს არ გვსურდა ეს ომი, მაგრამ ის ჩვენამდე მოიტანეს. ჩვენ არასდროს არ გვიოცნებია მოკვლაზე, მაგრამ გვიწევს მტრის განდევნა ჩვენი მიწიდან და ჩვენი ცხოვრებიდან. ჩვენ გვიწევს ავიტანოთ ის, რაც არც ერთ ევროპელ ერს უკვე 80 წელია არ უნახავს. და სწორედ ჩვენს მიწაზე წყდება გახდება თუ არა ვინმე სხვა ევროპაში მსგავსი აგრესიის მსხვერპლი,“- განაცხადა ზელენსკიმ.
პრეზიდენტის თქმით, მსოფლიო ლიდერები თანხმდებიან, რომ კონტინენტის მომავალს წყვეტს უკრაინა თავისი წინააღმდეგობით და მისი მეგობრები თავისი დახმარებით.
"თუ უკრაინაში შემოჭრა გრძელდება და რუსეთმა უარი არ თქვა გეგმებზე უკრაინის წინააღმდეგ, ეს ნიშნავს, რომ საჭიროა ახალი სასანქციო პაკეტი, ახალი სანქციები, ახალი ნაბიჯები ომის წინააღმდეგ მშვიდობისთვის. ბოიკოტი უნდა გამოცხადდეს რუსული ექსპორტის წინააღმდეგ, უფრო კონკრეტულად უარი უნდა ითქვას რუსულ ნავთობსა და ნავთობპროდუქტებზე. ამას შეგიძლიათ უწოდოთ ემბარგო და შეგიძლიათ უწოდოთ უბრალოდ მორალი, როდესაც უარს ამბობ ფული მიაწოდო ტერორისტს,“- განაცხადა პრეზიდენტმა.
მისი თქმით, საერთაშორისო საზოგადოებამ უფრო მეტად გადამწყვეტად უნდა იმოქმედოს.
"როდესაც ვიღაც კარგავს გონებას, მაშინ უნდა დაკარგო შიში და დაივიწყო კომერცია. თავი უნდა დაიცვა, უნდა იყოთ მორალური სახელმწიფოც და კომპანიაც. უნდა ებრძოლოთ არაადამიანურ ძალას, რომელსაც თვით ადამიანურობის მოსპობა სურს. უკრაინული ჯარის წარმატება, უკრაინელი ხალხის ნება, საერთაშორისო სანქციების პრინციპულობა - აი გზა მშვიდობისკენ,“- აღნიშნა ზელენსკიმ.
უკრაინის პირველმა პირმა თანამემამულეებს სიტყვით მიმართა და საკუთარი მომავლისთვის ბრძოლისკენ მოუწოდა
"უკრაინის ეროვნული დროშა არის უკრაინელების მსოფლმხედველობა: მშვიდობიანი მიწა და მშვიდობიანი ცა. უკრაინელებო! ჩვენ ბევრნი ვართ, მილიონობით ვართ და ეს არის მილიონობით გზა ჩვენი მომავლისთვის საბრძოლველად. ჩვენი სახელმწიფოსთვის, ჩვენი თავისუფლებისთვის, ჩვენი ლურჯ-ყვითელი ეროვნული დროშისთვის", - დასძინა მან.
პრეზიდენტმა ზელენსკიმ ხაზგასმით აღნიშნა, რომ უკრაინის დროშის ქვეშ არ მომხდარა თავდასხმები სხვა ქვეყნებზე, არ მომხდარა უცხო მიწების მიტაცება, არ დახოცილა ხალხი.
"ჩვენ და ტერორი სხვადასხვა სამყარო ვართ. ჩვენს დროშაზე სისხლი არ არის. არ არის და არც არასდროს იქნება შავი ლაქები, არც სვასტიკები. უკრაინის დროშა არის მიწა. მშვიდობიანი, ნაყოფიერი, ოქროსფერი და ტანკების გარეშე. ეს ცა მშვიდობიანია. სუფთა, ცისფერი და რაკეტების გარეშე. ასე იყო და ასე იქნება. მე მჯერა, ვიცი”, - განაცხადა ზელენსკი.