"გამოიკვეთა მხარეთა პოზიციების დაახლოება, მათი პოზიციები პირველ ოთხ პუნქტში თითქმის თანხვედრაშია" - მევლუთ ჩავუშოღლუ რუსეთ-უკრაინის მოლაპარაკებებზე
თურქეთის საგარეო საქმეთა მინისტრმა, მევლუთ ჩავუშოღლუმ რუსეთ-უკრაინის მოლაპარაკებებში კრიტიკულ საკითხებთან დაკავშირებით მხარეთა პოზიციების დაახლოებაზე განაცხადა.
მინისტრმა ასევე აღნიშნა, რომ გარკვეული საკითხები ზელენსკისა და პუტინის დონეზე უნდა გადაწყდეს.
ამის შესახებ ჩავუშოღლუმ Hurriyet -თან ინტერვიუში ისაუბრა.
"კრიტიკულ საკითხებთან დაკავშირებით გამოიკვეთა მხარეთა პოზიციების დაახლოება. როგორც ჩვენ ვხედავთ, მათი პოზიციები პირველ ოთხ პუნქტში თითქმის თანხვედრაშია. ზოგიერთ საკითხი ხელმძღვანელების დონეზე არის გადასაწყვეტი“, - განაცხადა ჩავუშოღლუმ.
ის მიიჩნევს, რომ თუ მხარეები ამ პოზიციებს არ შეიცვლიან, ცეცხლის შეწყვეტის იმედი იარსებებს.
„ლიდერებს შორის ღია დამაკავშირებელი არხი არსებობს. ახლა ეს ნამდვილად ცნობილი გახდა“, - განმარტა ჩავუშოღლუმ.