ვერტმფრენი და უსაფრთხოების სისტემა, რომელსაც დრონების ჩამოგდება შეუძლია - 700-მილიონიანი სუპერიახტა "შეჰერაზადა" შესაძლოა პუტინს ეკუთვნოდეს: რას დაადგენს გამოძიება?
რუსი ოპოზიციონერი პოლიტიკოსის, ალექსეი ნავალნის ანტიკორუფციული ფონდის ინფორმაციით, მსოფლიოში ერთ-ერთი ყველაზე დიდი და მდიდრული იახტა "შეჰერაზადა", რუსეთის ფედერაციის პრეზიდენტ ვლადიმერ პუტინთანაა დაკავშირებული და შესაძლოა, მას ეკუთვნოდეს.
- მათივე ცნობით, იახტა "შეჰერაზადა" მსოფლიოს 20 ყველაზე დიდ იახტას შორის არის, ღირებულება კი 700-მილიონ დოლარს შეადგენს.
ნავალნის ანტიკორუფციული ფონდი აღნიშნულთან დაკავშირებით აქვეყნებს 15-წუთიან ვიდეოს, სადაც ნათქვამია, რომ მათ "შეჰერაზადას“ წევრების სია აქვთ. ტელეფონის ნომრებისა და საკრედიტო ბარათების მონაცემების ანალიზის შედეგად კი აღმოჩნდა, რომ ამ ადამიანთა ნაწილი რუსეთის მოქალაქეები არიან და დასაქმებულნი არიან რუსეთის ფედერალური დაცვის სამსახურში.
რუსეთის ფედერალური დაცვის სამსახური, ეს არის სამთავრობო უწყება, რომელიც უზრუნველყოფს რუსეთში თანამდებობის პირების უსაფრთხოებას.
ვიდეოს მიხედვით, "შეჰერაზადას“ ეკიპაჟის ერთი წევრი ადრე მუშაობდა კიდევ ერთ მდიდრულ იახტაზე, რომელიც ასევე დაკავშირებულია პუტინთან.
- "შეჰერაზადა" აღჭურვილია ვერტმფრენით, კინოთეატრით, საცურაო აუზით და უსაფრთხოების სისტემითაც კი, რომელსაც შეუძლია დრონების ჩამოგდება. იახტა, რომელიც 2020 წელს გერმანულმა გემთმწარმოებელმა კომპანიამ ააგო, ამჟამად მდებარეობს პორტში იტალიის დასავლეთ სანაპიროზე.
აღსანიშნავია, რომ "ნიუ იორკ თაიმსის" ინფორმაციით, იახატასთან დაკავშირებით იტალიელმა სამართალდამცველებმა გამოძიება დაიწყეს.
ნავალნის ანტიკორუფციული ჯგუფი ადრე, 2021 წელს გამოქვეყნებულ ვიდეოში ამტკიცებდა, რომ ერთ-ერთი მდიდრული სასახლე პუტინს ეკუთვნოდა. პუტინმა ყოველივე უარყო, ხოლო რუსეთის პრეზიდენტის დიდი ხნის მეგობარმა არკადი როტენბერგმა თქვა, რომ სასახლე რეალურად მას ეკუთვნოდა.