თუ ზელენსკის ოსკარის ცერემონიაზე არ მიიწვევენ, შონ პენი გეგმავს, პროტესტის ნიშნად, თავისი ოსკარი გადაადნოს - "ამას საჯაროდ გავაკეთებ"
ჰოლივუდის ვარსკვლავი, შონ პენი ამბობს, რომ თავის ოსკარს პროტესტის ნიშნად გადაადნობს იმ შემთხვევაში, თუ ოსკარით დაჯილდოების ცერემონიაზე უკრაინის პრეზიდენტს, ვოლოდიმირ ზელენსკის არ მიიწვევენ.
ამის შესახებ მსახიობმა CNN-თან ინტერვიუში თქვა. შონ პენი ამბობს, რომ ამჟამად პოლონეთში იმყოფება და ჩართულია საქმიანობაში, რომლის მიზანიც უკრაინელი დევნილებისთვის ჰუმანიტარული დახმარების გაწევაა.
- "თუ ასე მოხდება, ოსკარის ცერემონიაში ჩართულ ყველა ადამიანს მოვუწოდებ, რომ პროტესტი გამოხატონ და დაჯილდოებას ბოიკოტი გამოუცხადონ. თუ აქამდე მივა საქმე, როცა დავბრუნდები, ჩემს ოსკარს საჯაროდ გადავადნობ.
თუკი ამერიკის კინოაკადემია უარს იტყვის, ცერემონიაზე ჩართოს ვოლოდიმირ ზელენსკი და მას სიტყვით გამოსვლის საშუალებას არ მისცემს, ეს იქნება ყველაზე საშინელი გადაწყვეტილება ჰოლივუდის ისტორიაში", - ამბობს შონ პენი.
ცნობისთვის, ოსკარით დაჯილდოების ცერემონია 27 მარტს გაიმართება და მისმა წამყვანმა, ემი შუმერმა ვოლოდიმირ ზელენსკის უკვე შესთავაზა, რომ ცერემონიაზე ონლაინ ჩაერთოს.