რატომ მიმართავენ კულტურის სფეროს წარმომადგენლები ელისო ბოლქვაძეს და რა შემთხვევაში მოითხოვენ მისთვის UNESCO-ს მშვიდობის ელჩის სტატუსის ჩამორთმევას?
კულტურის სფეროს წარმომადგენლების განცხადებით, მათ სფეროში არის ცენზურის მცდელობა და ბევრი სხვა პრობლემა, რომელიც დღემდე არ მოგვარებულა.
როგორც პოეტმა პაატა შამუგიამ პარლამენტში "ლელოს“ წევრებთან შეხვედრის შემდეგ განაცხადა, კულტურის სფეროს წარმომადგენლები მოითხოვენ, პარლამენტის წევრმა, ელისო ბოლქვაძემ პირადად აიღოს პასუხისმგებლობა. წინააღმდეგ შემთხვევაში, ისინი მოითხოვენ, რომ ელისო ბოლქვაძეს იუნესკოში მშვიდობის ელჩის სტატუსი ჩამოერთვას.
"ჩვენ შევიკრიბეთ იმისთვის, რომ საკანონმდებლო ორგანოს ჩვენი ხმა მივაწვდინოთ. გავაგებინოთ იმ პრობლემების შესახებ, რომელიც ზოგადად, კულტურის სფეროში არსებობს. ამ სფეროში ნამდვილად სერიოზული კრიზისი დგას, შეიძლება ჩიხიც კი ვუწოდოთ ამ მდგომარეობას, როდესაც აბსოლუტურად დახშულია კომუნიკაცია და ჩამკვდარია დიალოგი კულტურის სფეროს წარმომდგენლებსა და კულტურის სამინისტროს შორის, რაც ბევრ სხვადასხვა ფორმაში გამოიხატება, თუმცა, ჩემი გადმოსახედიდან, ამ სფეროსთვის ყველზე მავნე არის ის, რასაც ცენზურა ჰქვია და რომლის მცდელობის არაერთ მაგალითს ჩვენ ყოველდღიურ ცხოვრებაში ვხედავთ. ეს დავინახეთ მათ შორის "ლიტერასთან“, მწერალთა სახლთან დაკავშირებით, იქამდე წიგნის ცენტრთან დაკავშირებით. მუდმივად მიდიოდა წნეხი, კონკრეტულად მწერლობაზე ვსაუბრობ, თუმცა, ნებისმიერი სხვა სფერო, იქნება კინოცენტრი, ეროვნული თუ სხვადასხვა მუზეუმი, ყველგან არის ცენზურის მცდელობა. არათუ მცდელობა, არამედ ბევრგან უკვე განხორციელებულია ეს ქმედება.
ჩვენ მოვითხოვთ, რომ პარლამენტის კულტურის კომიტეტმა აღასრულოს თავის მოვალეობა. განსაკუთრებული ოპტიმიზმით არ ვართ განწყობილი, როდესაც ამას ვამბობთ, ვინაიდან ვხედავთ, რომ როდესაც კულტურის მინისტრი მოდის, როლები იცვლება და საკანონმდებლო ორგანომ, ნაცვლად იმისა, რომ კულტურის მინისტრისგან ჩაიბაროს ანგარიში, კულტურის მინისტრი იბარებს ანგარიშის სახით ქება-დიდებას, რომელსაც ჩვენი დეპუტატები აღუვლენენ ხოლმე, რაც სხვა თუ არაფერი, სამარცხვინოა.
მოვითხოვთ, ქალბატონმა ელისო ბოლქვაძემ, რომელიც საქართველოს კულტურის სფეროს წარმოადგენს საკანონმდებლო ორგანოსი, აიღოს საკუთარ თავზე პასუხისმგებლობა, წინააღმდეგ შემთხვევაში, ჩვენ ამ მტრული გარემოს, ცენზურის და უამრავი შემაფერხებელი გარემოს გამო, მოვითხოვთ მას "იუნესკოში“ მშვიდობის ელჩის ტიტული ჩამოერთვას. ვინაიდან, ადამიანი, რომელიც კულტურის სფეროში მიმდინარე რეპრესიებზე თვალს დახუჭავს, არ შეიძლება, მშვიდობის ელჩად იწოდებოდეს“, - განაცხადა შამუგიამ.