"აქვს КГБ-ში მუშაობის დიდი სტაჟი" - ვინ არის ალან გაგლოევი, რომელმაც ბიბილოვს ე.წ. საპრეზიდენტო არჩევნების პირველ ტურში მოუგო და როგორია განწყობა ადგილობრივებში

ოკუპირებული ცხინვალის რეგიონში, 28 აპრილს, ე.წ. საპრეზიდენტო არჩევნების მეორე ტური გაიმართება. პოლიტიკური ბრძოლის ველზე მთავარი მოქმედი პირები ანატოლი ბიბილოვი და ალან გაგლოევი არიან. დანარჩენებმა, "არჩევნების" პირველ ტურში ხმათა რაოდენობის ძალიან მიცრე პროცენტი მიიღეს.

ალან გაგლოევმა ხმების 36,9 პროცენტი მიიღო, ბიბილოვმა კი - 33,5. ადგილობრივები ამბობენ, რომ ბიბილოვის მარცხი გაგლოევთან მოსალოდნელიც იყო, რადგან წლების განმავლობაში ბიბილოვმა და მისმა გუნდმა "უამრავი შეცდომა დაუშვეს, როგორც ეკონომიკური, ასევე სხვა მიმართულებით."

• "ყველაზე ცუდი და უპატიებელი, რაც ბიბლოვმა გააკეთა, არის ოსური არმიის რუსულთან მიერთება. ამით მათი ფინანსური და სამხედრო მომზადების პასუხისმგებლობა მოიხსნა. ოსი ბიჭები რუსულ არმიაში კონტრაქტორებად მიდიოდნენ და ხელფასს იღებდნენ, ბიბილოვი ირწმუნებოდა, რომ ისინი სამხედრო მომზადებას მიიღებდნენ, მაგრამ მუდმივად იქნებოდნენ თავიანთ სამშობლოში, მისივე უსაფრთხოების დასაცავად, თუმცა, რუსეთ-უკრაინის ომში, არაერთი ოსი გაუშვეს. სამი სამხედრო უკვე გარდაიცვალა და ომის მიმდინარეობას თუ გადავხედავთ, მივხვდებით, რომ ყველაფერი არ დასრულებულა", - წერს სოციალურ ქსელში ადგილობრივი გიული კოკოევა.

ბიბილოვის მიმართ რომ უარყოფითი დამოკიდებულება აქვთ, ეს ე.წ. საპრეზიდენტო არჩევნებში უკვე დაამტკიცეს ახალგორელებმა, სადაც ბიბილოვმა გაგლოევთან შედარებით, ხმების თითქმის მესამედი აიღო.

"ბიბილოვს არ დაუმსახურებია ჩვენი მხარდაჭერა. ამდენი წელია ჩაკეტილობაში, ფაქტობრივად, ბლოკადაში ვყავართ. გახუთმაგებული ფასებით გვიწევს ყველაფრის შეძენა. წნელისის საგუშაგოს აღების მოთხოვნა აქვს აკვიატებული, ჯერ ჩვენგან მოითხოვა, მიმართეთ საქართველოს ხელიფლებას წერილით და ყველაფერს მოგიგვარებთო. არ გავაკეთეთ, პასუხად, რამდენჯერაც ჩამოვიდა, იმდენჯერ პირდაპირ გვითხრა - ქართულ მხარესთან გზის გახსნა დამოკიდებულია საქართველოს ხელისუფებაზე, რომელიც წნელისის საგუშაგოს არ იღებსო. მე და ჩემმა ოჯახმა სამი ურთულესი ზამთარი გადივიტანეთ, უამრავმა ადამიანმა, ჩვენმა ახლობლებმა, მეზობლებმა, ნათესავებმა, სახლები დაკეტეს და წავიდნენ.

მოხუცები უპატრონობით, უწამლობითა და უექიმობით იხოცებოდნენ. სიკვდილის პირას მისული ადამიანები ჯერ ცხინვალში მიჰყავდათ, შემდეგ დიდი წვალებით თბილისში, ზოგს გზაში უსწრებდა სიკვდილი, ზოგი საავადმყოფოში მიყვანის შემდეგ იღუპებოდა. ეს ყველაფერი ბიბილოვის კისერზეა. რაიონი დაიცალა. რატომ უნდა მივცეთ ხმა, რა დამსახურებისთვის?!

ბევრი არაფერი ვიცით ალან გაგლოევზე, ითქვა, რომ "კაგებეს" კლასია, იქ მსახურების დიდი სტაჟი აქვს, მაგრამ აქ, ამ პოსტზე სხვანაირად ვერ მოხვდები, ყველა რუსეთის კადრია, ყოფილი სამხედრო პირი იყო ბიბილოვი, მასაც ახლო ურითერთობა ჰქონდა უშიშროებასთან. ჩვენ და დანარჩენი მოსახლეობაც ისე ვართ გულაცრუებული და გაბრაზებული ბიბილოვზე, რომ აუცილებლად უნდა დამარცხდეს. ჩვენთვის არც ერთ ხელმძღვანელს ამდენი პრობლემა არ შეუქმნია", - ამბობს ერთ-ერთი ადგილობრივი AMBEBI.GE-სთან საუბრისას.

ახალგორელი სამოქალაქო აქტივისტის, თამარ მეარაყიშვილის თქმით, რამდენიმე დღის წინ, რაიონში ღორის ჭირი დაფიქსირდა. ადგილობრივებს უამრავი ღორი დაეხცოდათ. დახოცილი ღორები, ერთ-ერთ გავლენიან პირს იმ ადგილას გადაუყრია, საიდანაც ადგილობრივი მოსახლეობის ნაწილს სასმელი წყალი მიეწოდება. "გარემოს დაცვის უწყებისთვის" მიმართვის შემდეგ, ჩამდენი პირი გააფრთხილეს, თუმცა, სხვა მხრივ სიტუაცია გამოსწორდა თუ არა, ცნობილი არ არის...

"აქ ყველა გავლენებით ცდილობს ისარგებლოს. ადამიანები ახლობლებს ისეთ სამსახურებში აფორმებენ, სადაც მათ არასდროს უვლიან, ხელფასებს კი იღებენ", - ამბობს მეარაყაშვილი.

• ვინ არის ბიბილოვის მთავარი ოპონენტი ალან გაგლოევი?

ალან გაგლოევი ქალაქ ცხინვალში დაიბადა და გაიზარდა. ადგილობრივი მედიის ცნობით, 1997 წელს წარჩინებით დაამთავრა "ცხინვალის ელიტარული სკოლა" და თიბილოვის სახელობის უნივერსიტეტის ეკონომიკურ ფაკულტეტზე ჩააბარა. იმავდროულად, მეორე ფაკულტეტზე, "სამხრეთ ოსეთის სახელმწიფო უნივერსიტეტის" იურიდიულ ფაკულტეტზეც დაიწყო სწავლა, რის შემდეგაც ვლადიკავკაზში, რუსეთის ფედერაციის პრეზიდენტის პროგრამის ფარგლებში, კვალიფიკაციის ასამაღლებელი კურსები გაიარა.

2002 წლიდან მუშაობდა "სამხრეთ ოსეთის" ე.წ. ეკონომიკის სამინისტროში. ორი წლის შემდეგ კი, "უშიშროების კომტიტეტში" დაიწყო მუშაობა. 2017 წელს, ე.წ. საპრეზიდენტო არჩევნებში მონაწილეობდა", - წერს ოსური მედია.

ალან გაგლოევის მშობლები 2008 წლის აგვისტოში, ცხინვალი-ზარის გზაზე ტრაგიკულ შემთხვევას ემსხვერპლნენ.