"ქართულ ოცნებასა“ და სუს-ში ძალიან ბევრი ცდილობს, ჯეიმს ბონდი იყოს, მაგრამ ეს არ გამოსდით" - ხატია დეკანოიძე
"ქართულ ოცნებასა“ და სუს-ში ძალიან ბევრი ცდილობს, განსაკუთრებული ჯეიმს ბონდი იყოს, მაგრამ ეს არ გამოსდით, - ამის შესახებ ჟურნალისტებთან "ნაციონალური მოძრაობის“ ფრაქციის თავმჯდომარე ხატია დეკანოიძემ განაცხადა, რითაც უპასუხა მმართველი გუნდის განცხადებებს, რომ ვადამდელი არჩევნების საკითხი, რაზეც ხაბეიშვილმა ისაუბრა, ბაკურიანის საიდუმლო შეკრების გაგრძელებაა.
დეკანოიძე აცხადებს, რომ შეხვედრა საიდუმლო ხასიათის არ ყოფილა და მასზე სტრატეგიულ საკითხებზე მსჯელობდნენ.
"გულწრფელად არ მესმის, როგორ შეიძლება რაიმე საიდუმლო შეხვედრა დაიგეგმოს სასტუმროში, სადაც მონაწილეების გარდა არის კიდევ 200 ადამიანი. ვფიქრობ, "ქართულ ოცნებასა“ და სუს- ში ძალიან ბევრი ცდილობს, განსაკუთრებული ჯეიმს ბონდი იყოს, მაგრამ ეს არ გამოსდით. ასეთი შეხვედრები სულ ტარდება ოპოზიციაში, თუნდაც, მედიის წარმომადგენლებთან, მოხარული ვიქნები, მედიის წარმომადგენლები ვიხილო სტრატეგიულ შეხვედრაზე, რაც გულისხმობს როგორი უნდა იყოს ქვეყნის ევროინტეგრაციის კურსი. მსჯელობა ამ შეხვედრაზე იყო სტრატეგიულ საკითხებზე, კიდევ გვექნება ასეთი მსჯელობა, მათ შორის, იცით, ძალიან ხშირად ვხვდებით სხვადასხვა საერთაშორისო ორგანიზაციას. რაც შეეხება პიტერ აკერმანს, ყველას მოვუწოდებ, მათ შორის, უმრავლესობის წარმომადგენლებს, ალბათ, არ იციან, ეს ადამიანი ვინ არის, "დაგუგლონ“ და გაიგონ. არ მგონია, ბატონმა მიხეილ ყაველაშვილმა იცოდეს, ვინ არის პიტერ აკერმანი, ფლეტჩერის სკოლა არ ვიცი "ქართულ ოცნებას“ გაუგია თუ არა, მაგრამ მათ შეუძლია ამ სკოლის ბორტში შეამოწმონ,“ - განაცხადა დეკანოიძემ.
ამასთან, დეკანოიძე "ნაციონალური მოძრაობის" წევრის, ლევან ხაბეიშვილის განცხადებას გამოეხმაურა იმის თაობაზე, რომ ხვალ, 20 აპრილს, საქართველოს ყოფილი პრეზიდენტი მიხეილ სააკაშვილი, მის სასამართლო პროცესზე, ვადამდელი არჩევნების გეგმასთან დაკავშირებით ისაუბრებს და აღნიშნა, რომ ვადამდელი არჩევნების მოთხოვნა არსად წასულა დღის წესრიგიდან და კვლავ დგას, ხოლო ნებისმიერ პოლიტიკურ ძალას და პოლიტიკოსს თავის მოსაზრების გაჟღერების უფლება აქვს.
"პროტესტი არის ფორმა დემოკრატიის, რომელიც ქვეყანაში გამოხატვას უზრუნველყოფს. ყველა ვთანხმდებით, რომ ხელისუფლების ცვლილება არის აუცილებელი. ამას ჭირდება რამდენიმე მნიშვნელოვანი კონპონენტი: ოპოზიციის სერიოზული ერთობა, ეს არ არის მხოლოდ ის, რომ ერთ პარტიულ სიაში მოვთავსდეთ ან ყველას ერთი წარმოდგენები გვქონდეს, ეს ნიშნავს იმას, თუ როგორი უნდა იყოს არჩევნების შემდგომ ახალი კოალიციური ერთიანობა, ეს ეხება ევროინტეგრაციას, კანონის უზენაესობას, ინსტიტუციურ განვითარებას. ყველაზე მნიშვნელოვანი ბერკეტია ჩვენთვის მოქალაქეებს ვაჩვენოთ, რომ არსებობს ალტერნატივა და მზად ვართ კოორდინაციისთვის,"-განაცხადა დეკანოიძემ.