ავტორი:

"დღეს ივანიშვილი გახდა საქართველოს იანუკოვიჩი!" - არახამია ევროკავშირსა და აშშ-ს ხელმძღვანელობას ბიძინა ივანიშვილისთვის პერსონალური სანქციების დაწესებისკენ მოუწოდებს

"დღეს ივანიშვილი გახდა საქართველოს იანუკოვიჩი!" - არახამია ევროკავშირსა და აშშ-ს ხელმძღვანელობას ბიძინა ივანიშვილისთვის პერსონალური სანქციების დაწესებისკენ მოუწოდებს

უკრაინის პარლამენტის ფრაქცია "ხალხის მსახურის“ თავმჯდომარე დავით არახამია საქართველოს ხელისუფლებას კვლავ აკრიტიკებს.

"უკრაინელები და ქართველები ყოველთვის იყვნენ და იქნებიან მოძმე ხალხები. მაგრამ ეს არ ეხება ქვეყნის მმართველ ელიტას" - თქვა მან RBC-Ukraine- ისთვის მიცემულ ინტერვიუში.

არახამიას შეფასებით, საქართველოს ხელისუფლება პრორუსულ პოლიტიკას ატარებს, რაც იმაში გამოიხატება, რომ მმართველი გუნდი ცდილობს, ოკუპანტ ქვეყანას სანქციებისთვის თავის არიდებაში დაეხმაროს. ამასთანავე, არახამიას თქმით, საქართველოს ხელისუფლება თავს იკავებს იმისგან, რომ რუსეთი აგრესორად ღიად და მკაფიოდ გამოაცხადოს.

მისივე განმარტებით, საქართველოს ხელისუფლების პრორუსულ განწყობებს ადასტურებს ბიძინა ივანიშვილის ახლო კავშირები რუსულ პოლიტიკურ ელიტასთან. იგი ევროკავშირსა და ევროკავშირსა და აშშ-ს ხელმძღვანელობას მოუწოდებს ივანიშვილისთვის პერსონალური სანქციების დაწესების საკითხი განიხილონ.

"ქართველები ომში უკრაინისთვის იბრძვიან, საქართველოს ცნობილმა ადამიანებმა 24 თებერვლამდეც კი გადაიღეს ჩვენი მხარდასაჭერი ვიდეოები. ისინი მხარს უჭერენ უკრაინას და ჩვენს გამარჯვებას ომში. მაგრამ ეს არ ეხება საქართველოს ხელისუფლებას. და მიზეზი ძალიან მარტივია - ამ კავშირებს ადასტურებს მთავარი ქართველი ოლიგარქი ბიძინა ივანიშვილი, რომელიც მჭიდროდ არის დაკავშირებული რუსულ პოლიტიკურ ელიტასთან. ახლახან გამოქვეყნებული "ივანიშვილის ჩანაწერები" ადასტურებს ამ კავშირებს. დღეს ივანიშვილი გადაიქცა ქართველ იანუკოვიჩად. ის და მისი ხალხი ატარებენ იმგვარ პოლიტიკას უკრაინის მიმართ, რომელსაც ქართველი ხალხი მხარს არ უჭერს. მათ სურთ ქართველებისა და უკრაინელების გადამტერება. ამის თავიდან ასაცილებლად, მივმართავ ევროკავშირსა და აშშ-ს ხელმძღვანელობას, განიხილონ პერსონალური სანქციების დაწესება ივანიშვილსა და დასავლეთში არსებულ მის აქტივებზე. არავინ უნდა გაექცეს პასუხისმგებლობას - არც ოკუპანტები და არც ისინი, ვინც მათ ეხმარება.", - აღნიშნავს არახამია.

ცნობისთვის, ქართული მედიასაშუალებებით გავრცელდა ჩანაწერი, რომელიც შესაძლოა ასახავდეს ბიძინა ივანიშვილისა და რუსი ოლიგარქის, ვლადიმირ ევტუშენკოვის საუბარს. გავრცელებულ ჩანაწერში, სადაც ორ სხვადასხვა დროს შემდგარი სავარაუდო ლაპარაკია ნაჩვენები, სავარაუდოდ ივანიშვილი სავარაუდოდ ევტუშენკოვს ეუბნება, რომ "სიტუაცია არასახარბიელოა, მაგრამ გაძლებაა საჭირო, რას იზამ".

აღსანიშნავია, რომ აღნიშნულ აუდიო ჩანაწერს, პარტია "ქართული ოცნება - დემოკრატიული საქართველოს“ თავმჯდომარე ირაკლი კობახიძემ "სისულელე" უწოდა.

"აუდიოჩანაწერი არის სისულელე. კაცმა არ იცის ავთენტურია თუ არ არის ავთენტური. ამის გადამოწმების საშუალება ჩვენ არავითარი ფორმით არ გვაქვს. ასევე საინტერესოა, რა იყო წყარო, რომელიც ბუნებრივია, ვერ იქნებოდა ქართული მხარე. საინტერესოა, ხომ არ იყო წყარო "ტვ პირველისთვის“ რუსული მხარე, როდესაც ამ ჩანაწერს იღებდა, თუ ეს ჩანაწერი არის ავთენტური. ასეც და ისეც, საქმე ეხება ერთ-ერთ რუს ბიზნესმენს, რომელიც რეპრესირებულია რუსეთის ხელისუფლების მხრიდან. თუ ვინმე შეგვიძლია ჩვენ გავიხსენოთ რეპრესირებული რუსი ბიზნესმენებიდან ხადარკოვსკის შემდეგ, არის ეს კონკრეტული რუსი ბიზნესმენი.

როდესაც ასეთ დროს პირად საუბარს, მათი მტკიცებით, აქვეყნებს ტელევიზია, ეს მეტყველებს მათ ღირებულებებზე და სტანდარტებზე. ღიმილის მომგვრელთან ერთად ეს არის ტრაგიკული მოვლენა და ახასიათებს იმ ტელევიზიებს, რომლებიც განეკუთვნებიან ომის პარტიას, "ნაციონალურ მოძრაობას“, - განაცხადა კობახიძემ.