"არ ვაპირებთ სოლოვიოვის მკვლელობას - შესაძლებელია, ის თავისი პროპაგანდისტული საქმიანობის მდარე "პროდუქტებში” დაიხრჩოს" - უკრაინის უშიშროების სამსახური რუსული მხარის ბრალდებაზე
უკრაინის უშიშროების სამსახური აცხადებს, რომ რუსი პროპაგანდისტის ვლადიმერ სოლოვიოვის მკვლელობას არ გეგმავს.
უკრაინის უშიშროების სამსახურის (SBU) განცხადების თანახმად, ის მუშაობს საკუთარი ქვეყნის უსაფრთხოების გასაძლიერებლად და არც დრო აქვს და არც სურვილი "დივერსიებისთვის“, როგორიცაა რუსული პროპაგანდისტების მკვლელობა.
უკრაინის უშიშროების სამსახურის ინფორმაციით, ინტერესით შეისწავლა რუსეთის FSB-ს ეს უკანასკნელი "ფიქტიური მოხსენება", რომ მათ "გმირულად დააკავეს ნეონაცისტები", რომლებიც, სავარაუდოდ, "საზოგადოებრივი მოღვაწე" ვლადიმერ სოლოვიოვის მკვლელობას SBU-ს მოთხოვნით გეგმავდნენ.
"SBU-ს ამ მხრივ მხოლოდ სამი რამ აქვს სათქმელი:
- პირველ რიგში, უკრაინის უშიშროების სამსახური სისტემატიურად მუშაობს ჩვენი ერის უსაფრთხოების გაძლიერებაზე და არ აპირებს სერიოზული კომენტარი გააკეთოს რუსული სპეცსამსახურების ახალ ფანტაზიებზე, რომლებიც უბრალოდ იგონებენ თავიანთ მიღწევებს რუსული აუდიტორიისთვის.
- მეორეც, სოლოვიოვი არ არის საზოგადო მოღვაწე, არამედ უბრალო პროპაგანდისტი - გებელსის რუსული ვერსია - რომელსაც უკრაინის გამარჯვების შემდეგ მოუწევს საერთაშორისო სასამართლოს წინაშე წარდგენა თავისი დანაშაულებისთვის.
- მესამე, SBU არ აპირებს ვლადიმერ სოლოვიოვის მკვლელობას. ამავდროულად, თუ გავითვალისწინებთ იმ რაოდენობის ყალბ და ანტი-უკრაინულ განწყობებს, რომლებსაც ეს ადამიანი ავრცელებს, საკმაოდ შესაძლებელია, რომ ის დაიხრჩოს თავისი მდარე ხარისხის პროპაგანდისტული საქმიანობის "პროდუქტებში", - ნათქვამია განცხადებაში.
ცნობისთვის, დღეს რუსეთის უსაფრთხოების ფედერალურმა სამსახურმა გაავრცელა ინფორმაცია, რომ FSB-ის თანამშრომლებმა დააკავს 6 პირი, რომლებიც უკრაინის უშიშროების სამსახურის დაკვეთით კრემლის პროპაგანდისტ ვლადიმირ სოლოვიოვის მკვლელობას ამზადებდნენ.
FSB ინფორმაციით, სოლოვიოვის მკვლელობის მცდელობაში ბრალდებულებს სოლოვიოვის მოკვლა მოსკოვში მისი მანქანის აფეთქებით ჰქონდათ განზრახული.
უწყების მტკიცებით, თავდამსხმელები აკრძალული ნეონაცისტური ორგანიზაციის ნაციონალ-სოციალიზმი/თეთრი ძალის წევრები არიან და მათ დანაშაული აღიარეს.