"მებრძოლი დელფინები" - რატომ განათავსა გაწვრთნილი ძუძუმწოვრები რუსეთმა შავ ზღვაში და რა შეუძლიათ სამხედრო მიზნებისთვის გაწვრთნილ დელფინებს

ბოლო დღეებია მედიაში წერენ, რომ თანამგზავრიდან გადაღებული ახალი ფოტოების ანალიზის მიხედვით ირკვევა, რუსეთმა შავ ზღვაში თავის ბაზაზე სამხედრო დანიშნულების, გაწვრთნილი დელფინები განათავსა. როგორც "გარდიანი" წერს, ამის მიზანი შესაძლოა, შავ ზღვაში რუსული ფლოტის წყალქვეშა თავდასხმისგან დაცვა იყოს.

როგორც გამოცემა წერს, აშშ-ის საზღვაო ინსტიტუტმა სევასტოპოლის ნავსადგურის საზღვაო ბაზის თანამგზავრიდან გადაღებული სურათები განიხილა და დაასკვნა, რომ დელფინების ნაწილი იქ ჯერ კიდევ თებერვალში, უკრაინაში შეჭრამდე გადაიყვანეს, თუმცა ახლა კიდევ დაამატეს.

რუსეთს დელფინების სამხედრო მიზნებისთვის გაწვრთნის დიდი ისტორია აქვს და შესაბამისი პროგრამა მათ ჯერ კიდევ საბჭოთა კავშირის დროიდან დაიწყეს.

საბჭოთა კავშირის პერიოდიდან სამხედრო დანიშნულების დელფინები უკრაინაშიც ჰყავდათ. უკრაინელებმა ე.წ. სევასტოპოლის პროგრამა 2012 წელს განაახლეს, თუმცა 2014 წელს, რუსეთის ყირიმის შეჭრის შემდეგ, რუსულმა ძალებმა უკრაინული სამხედრო ნაწილი დაიპყრეს, რომელშიც შედიოდნენ უკრაინული "მებრძოლი დელფინები."

• წყლის ძუძუმწოვრების გამოყენებით შესაძლებელია ბრძოლის დროს წყალქვეშ უპირატესობის მოპოვება.

2017 წელს რუსეთის სახელწიფო ტელევიზიამ გაავრცელა ინფორმაცია იმის შესახებ, რომ ქვეყანა ატარებდა ექსპერიმენტს ვეშაპებითა და დელფინებით საზღვაო ტერიტორიების დასაცავად. მათივე ინფორმაციით, წყლის ძუძუმწოვრებს გამოიყენებდნენ მყვინთავების დასახმარებლად.

მოგვიანებით, ექსპერიმენტიდან ვეშაპები ამოიღეს, რადგანაც აღმოჩნდა, რომ პოლარულ წყლებში ცურვა მათ აავადებდა.

• "მებრძოლ დელფინებს" იყენებენ წყალქვეშა ნაღმების მოსაძებნად, ან მტრის მყვინთავების აღმოსაჩენად.

ზღვის ძუძუმწოვრების სამხედრო მიზნებისთვის გამოყენება არ შემოიფარგლება მხოლოდ რუსეთით. აშშ-ს საზღვაო ძალებს მსგავსი პროგრამა 1960-იანი წლებიდან აქვს და მისი განვითარებისთვის ყოველ წელს მილიონობით დოლარი იხარჯება.

სამხედრო მიზნებისთვის გაწვრთნილ დელფინებს აქვთ უნარი აღმოაჩინონ და იპოვონ სამიზნეები წყლის სიღრმეში და ეს სამხედროებისთვის ძალიან ღირებული რამაა. დელფინები გამოიყენება იმ ნაღმების აღმოსაჩენად, რომლებიც ზღვის ფსკერზეა ჩაფლული.

ზღვის ძუძუმწოვრების კვლევის პროგრამის ხელმძღვანელი ჰავაის უნივერსიტეტიდან, პოლ ნაჩტიგალი ამბობს, რომ დელფინები უკეთესია, ვიდრე ნებისმიერი ტექნოლოგია, როცა საქმე წყალქვეშა ნაღმის აღმოჩენას ეხება - ისინი არიან უფრო სწრაფები და უფრო ზუსტები.