"შენობა საკმაოდ ძველია, ეჭვქვეშაა მისი მდგრადობა" - საგარეო საქმეთა სამინისტრო ეროვნული ბანკის ყოფილ შენობაში გადადის

საგარეო საქმეთა სამინისტრო ჩიტაძის 4 ნომერში მდებარე შენობიდან ეროვნული ბანკის ყოფილ შენობაში, ლეონიძის ქუჩის 3 ნომერში გადადის. უკვე დაგეგმილია თანამშრომელთა ეტაპობრივი გადაყვანა.

ამის შესახებ "ინტერპრესნიუსს“ საგარეო საქმეთა სამინისტროში განუცხადეს.

როგორც უწყებაში განმარტავენ, შენობა ავარიულია და მისი რეაბილიტაცია უნდა განხორციელდეს.

"საგარეო საქმეთა სამინისტრო, პრემიერ-მინისტრის ინიციატივის ფარგლებში, რომელიც გულისხმობს საჯარო ინფრასტრუქტურის გაუმჯობესებას, მშენებლობის მასშტაბურ პროგრამას და განვადებით მშენებლობის მასშტაბურ პროგრამას, გეგმავს ჩიტაძის 4 ნომერში არსებული შენობის მშენებლობა/რეაბილიტაციას. საგარეო საქმეთა სამინისტროს შენობა საკმაოდ ძველია, ეჭვქვეშაა მისი მდგრადობა და ესპერტიზის დასკვნითაც დასტურდება, რომ შენობა საჭიროებს რეაბილიტაციას. შესაბამისად, დაიგეგმა თანამშრომელთა ეტაპობრივი გადაყვანა ლეონიძის ქუჩის 3 ნომერში მდებარე შენობაში“, - განუცხადეს "ინტერპრესნიუსს“ საგარეო საქმეთა სამინისტროში.