"ჩვენი სიცოცხლე არაფერს ნიშნავს, ჩვენი ბრძოლა - ყველაფერს - ტყვედ ჩავარდნა ჩვენთვის სიკვდილია" - "აზოვის" მებრძოლი
უკრაინელი ჯარისკაცი, რომელიც ალყაში მოქცეული "აზოვსტალის” ტერიტორიაზე იმყოფება, ქარხანაში არსებულ შემზარავ პირობებზე ლაპარაკობს და აცხადებს, რომ დარჩენილი დამცველები მნიშვნელოვან მსხვერპლს განიცდიან.
"აზოვის“ პოლკის წევრმა, ლეიტენანტმა ილია სამოილენკომ Sky News-ს განუცხადა, რომ დაშავებული და დაღუპული ჯარისკაცების რაოდენობა "ძალიან მაღალია" და სამხედროები იმსახურებენ სათანადო ზრუნვას.
"არავინ ელოდა, რომ ამდენ ხანს გავუძლებდით რუსების წინააღმდეგ ბრძოლას, მაგრამ მაინც ვიბრძვით. ჩვენ ვიღებთ დიდ მსხვერპლს, განვიცდით დანაკარგებს, ” - აღნიშნა მებრძოლმა.
მისი თქმით, ადგილზე მყოფებს აქვთ "უკიდურესად შეზღუდული რესურსები" და მიაჩნიათ, რომ "ყოველი დღე შეიძლება იყოს უკანასკნელი".
”ამის შედეგი შეიძლება იყოს დატყვევება მტრის მიერ, რაც ჩვენთვის სიკვდილს ნიშნავს. ჩვენი სიცოცხლე არაფერს ნიშნავს, მაგრამ ჩვენი ბრძოლა - ყველაფერს," - აღნიშნა "აზოვის“ პოლკის წევრმა.
უკრაინის პრეზიდენტმა ვოლოდიმირ ზელენსკიმ კიდევ ერთხელ ისაუბრა "აზოვსტალზე" და განაცხადა, რომ მის ქვეყანას არ მიუღია საკმარისი იარაღი მარიუპოლის ალყის განსაბლოკად და ქალაქის გასათავისუფლებლად.
“უკრაინელი დამცველები ჯერ კიდევ აგრძელებენ წინააღმდეგობას "აზოვსტალის" ქარხანაში. ჩვენ ვიყენებთ ყველა შესაძლო დიპლომატიურ ინსტრუმენტს მათ გადასარჩენად, მაგრამ რუსეთი შემოთავაზებულ ვარიანტებს არ თანხმდება. ჩვენ ვთხოვეთ ჩვენს პარტნიორებს იარაღის მიწოდება მარიუპოლის განბლოკვისთვის, სამოქალაქო და სამხედრო პერსონალის გადასარჩენად”, - განუცხადა მალტელ დეპუტატებს ზელენსკიმ.
უკრაინის ლიდერის თქმით, მისი ქვეყნის ქალაქებზე ომის დაწყებიდან 2250 სარაკეტო იერიში განხორციელდა.
"დაბომბვა არ წყდება არც დღისით და არც ღამით“, - დასძინა უკრაინის პირველმა პირმა.
იხილეთ ასევე: