"მე მყავდა "ტოიოტა პრიუსი" და ჩემს შემდეგ მოსულ მინისტრს დარჩა - რამდენიმე თვის შემდეგ მძღოლი შემხვდა და..." - რას წერს ეკონომიკის ექსმინისტრი?
ეკონომიკის ყოფილი მინისტრი ვერა ქობალია ნიკა გვარამიას საქმეზე გამოტანილ განაჩენს ეხმაურება და საკუთარი მინისტრობის შემდგომ პერიოდს იხსენებს.
ექსმინისტრი აღნიშნულ საკითხზე პოსტს სოციალურ ქსელში ავრცელებს.
"მე მყავდა "ტოიოტა პრიუსი" და ჩემს შემდეგ მოსულ მინისტრს დარჩა. რამდენიმე თვის შემდეგ მძღოლი შემხვდა სხვა მანქანით. პრიუსი რა უყავი თქო ვუთხარი. მინისტრს უფრო დიდი მანქანა ერჩევნა და პრიუსით მისი ოჯახი დადისო" - წერს ქობალია.
ცნობისთვის, "მთავარი არხის“ დამფუძნებელს, ნიკა გვარამიას 3 წლით და 6 თვით პატიმრობა მიესაჯა. კერძოდ, ნიკა გვარამია ტელეკომპანია "რუსთავი 2“-სთვის 6 763 509 ლარის ზიანის მიყენების ფაქტზე, დამნაშავედ იქნა ცნობილი. სასამართლომ ბრალდებულის ქმედება სისხლის სამართლის კოდექსის 182-ე მუხლიდან 220-ე მუხლით დააკვალიფიცირა, რაც სამეწარმეო ორგანიზაციაში უფლებამოსილების ბოროტად გამოყენებას გულისხმობს. აღნიშნულისთვის გვარამიას სასჯელის სახედ და ზომად განესაზღვრა ჯარიმა 50 000 ლარის ოდენობით.
რაც შეეხება ავტომობილის ეპიზოდს, ბრალდების თანახმად, 2019 წლის თებერვალში, ნიკა გვარამიამ "თეგეტა პრემიუმ ვიიქელსის" ხელმძღვანელებს, "რუსთავი 2"-ის კანონიერი ინტერესის საწინააღმდეგოდ, შესთავაზა მათგან ძვირადღირებული ავტომობილის შეძენა, ტელეკომპანია "რუსთავი 2"-ის ეთერში მათი სარეკლამო რგოლების განთავსების სანაცვლოდ, რაც მასთან დაკავშირებული სარეკლამო სააგენტო შპს "iპროესკო მედიას“ მეშვეობით განხორციელდებოდა.
შეთანხმებისამებრ, 2019 წლის 27 თებერვალს, შპს ,,თეგეტა პრემიუმ ვიიქელსსა“ და შპს ,,პროესკო მედიას“ შორის, გაფორმდა ავტომანქანა ,,Porche Macan S”-ის ნასყიდობის ხელშეკრულება ღირებულებით - 76 700 ევრო, რომლის საფუძველზეც ავტომანქანა ნიკა გვარამიასა და მისი ოჯახის ფაქტობრივ საკუთრებაში გადავიდა, ხოლო ფორმალურ მესაკუთრედ შპს ,,პროესკო მედია“ დაფიქსირდა.
მიუხედავად იმისა, რომ შპს ,,თეგეტა პრემიუმ ვიიქელსი“ კეთილსინდისიერად ასრულებდა ხელშეკრულებით გათვალისწინებულ მოთხოვნებს და სრულად უხდიდა შპს ,,პროესკო მედიას“ ხელშეკრულებით გათვალისწინებულ სარეკლამო ღირებულებას, ეს უკანასკნელი, ნიკა გვარამიას დავალებით, არსებითად ამცირებდა ტელეკომპანია რუსთავი 2-სთვის გადასახდელ თანხებს, რითაც მნიშვნელოვანი ზიანი ადგებოდა ტელეკომპანიას.