რუსულმა ძალებმა სუმის ოლქზე სარაკეტო იერიში მიიტანეს, ხოლო ჩერნიგოვი დაბომბეს - არიან დაღუპულები და დაშავებულები

რუსი ოკუპანტების იერიში უკრაინის სხვადასხვა მიმართულებით გრძელდება.

• უკრაინული მედიის ინფორმაციით, რუსულმა ძალებმა სუმის ოლქის ქალაქ ოხტირკაზე სარაკეტო თავდასხმა განახორციელეს.

"ხუთმა რუსულმა რაკეტამ სამოქალაქო ობიექტებს დიდი ზიანი მიაყენა. საწყობებს ცეცხლი გაუჩნდა. დარტყმის ტალღამ ორსართულიანი საცხოვრებელი შენობის შესასვლელი კარი დააზიანა, შენობაში ხალხი ჩარჩა. დაზიანდა ბევრი კერძო სახლი. ეკლესიაში მინები ჩაიმსხვრა. დაზიანდა საბავშვო ბაღიც“, - ამის შესახებ ოლქის გუბერნატორი დმიტრო ჟივიცკი "ტელეგრამში“ იუწყება.

მისი თქმით, თავდასხმის შედეგად მინიმუმ 5 ადამიანი დაშავდა.

• ოკუპანტებმა დაბომბეს ჩერნიგოვის ოლქში სამხედრო ქალაქი დესნა.

"არიან დაღუპულები და დაშავებულები" - უკრაინული მედიის ინფორმაციით, ამის შესახებ ოლქის სამხედრო ადმინისტრაციის ხელმძღვანელი ვიაჩესლავ ჩაუსი იუწყება.

"დილით მტერმა დასახლება დესნაზე სარაკეტო იერიში მიიტანა. წინასწარი ინფორმაციით, გვყავს დაღუპულები და ბევრი დაჭრილი“, - აცხადებს გუბერნატორი.

მისი თქმით, დაბომბვის ადგილზე მაშველები მუშაობენ და დეტალები მოგვიანებით გახდება ცნობილი.