"თბილისში მშენებარე ბინა გავყიდე და აქ მიწა ვიყიდეთ... ქალაქში გადაღებებზე მატარებლით ჩავდივარ" - ზღვისპირეთში გადასახლებული ცნობილი მსახიობის შეცვლილი ცხოვრება
მსახიობმა ლევან სუხიტაშვილმა ბოლო დროს სოციალურ ქსელში ფსევდონიმი ლევან კაპროვანელი დაირქვა. მას არაფერი მოუგონია, მართლა კაპროვანელია, უკვე რამდენიმე წელია, ზღვისპირეთში, კაპროვანში (ადგილი შეკვეთილსა და ურეკს შორის) დასახლდა.
"2012 წელს მე და ჩემი ცოლი მამუკა ღლონტთან სტუმრად ვიყავით. აქაურობა ძალიან მოგვეწონა... თბილისში მშენებარე ბინა გვქონდა, ის გავყიდე და აქ მიწა ვიყიდეთ. გარკვეული პერიოდის შემდეგ კი ჩემს ქვისლს ვუთხარი, მოდი, რამე გავაკეთოთ-მეთქი და ასეც მოხდა. სახლი ავაშენეთ. მშენებლობის პერიოდში უკვე იდეა მომივიდა, სახლისთვის კომერციული სახე მიგვეცა. შევთანხმდით და საოჯახო სასტუმრო გავაკეთეთ ლამაზ და წყნარ გარემოში... მოკლედ, ამ საქმეში ვართ ერთი ოჯახი - მე, ჩემი ცოლი, მისი და და მისი მეუღლე... მე ძირითადად სულ აქ ვარ" - გვეუბნება ლევანი.
- აქ სიმშვიდეში ვართ, რასაც ადამიანი თბილისში ძალიან მონატრებულია. გარდა ამისა, პატარა ბოსტანი გავაკეთე, - მცენარეებმა დამაინტერესა. საერთოდ, ვინც გადაწყვეტს, ამ მიმართულებით გადაერთოს, ნამდვილად კარგ ნაბიჯს გადადგამს, დამიჯერეთ, სხვა ინტერესები გაუჩნდება. მგონი, ჯობია, რომ ადამიანები სოფელს ნელ-ნელა დაუბრუნდნენ.
- ამ ყველაფერს ადვილად აუღე ალღო?
- ზოგადად ასეთი ტიპი არ ვიყავი, რომ მსგავს გარემოში დიდხანს გამეძლო. ცოტა ქაოსი მიყვარს. ეს საქმეები, რასაც ახლა ვაკეთებ, არ ვიცოდი, ალბათ იმიტომ, რომ ასეთ სიტუაციაში არც ვყოფილვარ. ასე აქ პირველად მშენებლობის პერიოდში "მოვიწამლე". არადა, ადრე მამუკა ღლონტი თავის საქმეებზე რომ მელაპარაკებოდა (იცით, რომ ის აქ ყველაზე ადრე დასახლდა და დიდ წარმატებასაც მიაღწია), ვერ ვხვდებოდი, რას მეუბნებოდა. ახლა ზუსტად მესმის და ვხდები... მოკლედ, ასეა, ერთ რაღაცას რომ გააკეთებ, სხვა რამი გაკეთების სურვილი ისევ გიჩნდება. ჩემ შემთხვევაშიც ასე მოხდა. თავიდან ხე დავრგე და ინტერესი თანდათან მოვიდა...
წარმოიდგინეთ, მიწას ვამუშავებ და თან, ზღავზე ვარ - სხვა სამყაროში მოვხვდი, რაც მსიამოვნებს... შარშან სამი დასახელების მწვანილი, ასევე კიტრი დავთესე, რამდენიმე სახეობის ყვავილი დავრგე და ყველაფერს ვუვლიდი. მერე საქმემ ისე მიმიზიდა, რომ წელს უკვე რაღაცები წავიკითხე, ცოტა ცოდნა შევიძინე, განათლება ავიმაღლე და რაღაცები უკეთესად გავაკეთე. ამას იმხელა აზარტი აქვს, ისე გაინტერესებს, მერე ყველაფერს როგორც შვილს, ისე უვლი. სოფელი გიზიდავს. სამწუხაროა, რომ თაობები მიწას მოვწყდით, ადამიანები ასეთ შრომას გადაეჩვივნენ და დაივიწყეს. ბევრი თაობა გაიზარდა, ვისაც სოფელთან შეხება არ ჰქონია...
ბავშვობაში მახსოვს, პაპას რომ ვეხმარებოდი, მაგრამ მაშინ ამ ყველაფერს ასე ვერ აღვიქვამდი... აგარაკი კარგია, მაგრამ ერთხელ რომ იგრძნობ მიწის მადლს, მცენარეს რომ დაუმეგობრდები, ხეს რომ დარგავ, უკვე შენია და, როგორც ვთქვი, მეტის გაკეთების სურვილი გიჩნდება. ძალიან მაგარი რაღაცაა, თუ ადამიანი ამას შეიგრძნობს და მინდა, ეს ყველამ განიცადოს.
- მიწის ფართობი დიდია?
- არ არის დიდი ფართობი. ჩვენი საოჯახო სასტუმროს უკანა მხარეს, ცოტა ხრიოკი იყო და გადავწყვიტე, გამელამაზებინა, რომელსაც სეზონების მიხედვით ვამუშავებ. ამ ეკოლლოგიურად სუფთა პროდუქტით ჩვენი სტუმრებიც სარგებლობენ.
- მსახიობობა დაივიწყე?
- არა, ამ მიმართულებითაც ვმუშაობ. არის ახალი იუთუბსერიალი - "ჩვენი პირველი სერიალი", ჩპს, საკმაოდ კარგი და პოპულარულიცაა, ბევრი მაყურებელი ჰყავს. სამშაბათობით თბილისში გადაღებაზე მივდივარ.
- კაპროვანი ისე გიყვარს, რომ ფსევდონიმიც - ლევან კაპროვანელი შეიქმენი, რითაც აქაურობას ერთგვარად არეკლამებ, ხომ?
- იმიტომ დავირქვი, რომ კაპროვანს პოპულარიზაცია გავუწიო. აქაურობას რატომღაც შეკვეთილს უწოდებდნენ, მამუკამ წამოიწყო ეს საქმე, რომ ჩვენი დასახლება აქტიურად კაპროვანის სახელით მოვიხსენიოთ. ყველამ უნდა თქვას, რომ ეს დასახლება კაპროვანია და არა შეკვეთილი. ამ მიმართულებით მეც პატარა აგური დავდე და სტუმრები, უცხოები რომ მოდიან, უკვე კაპროვანს კითხულობენ.
- ამ დაბის აღმშენებლობაში გზა გაკვალეთ...
- მამუკა ამ მხრივ პირველია. ვთავაზობ, - კაპროვანის მერი გახდი-მეთქი. ხომ გვჭირდება პატრონი?!
- ოთხი შვილის მამა ხარ - ბავშვებს უყვართ აქ ყოფნა?
- კი, როგორ არა. დღეს გავაცილე, აქ იყვნენ. ჩვენ მატარებლით ვსარგებლობთ და ძალიან კმაყოფილები ვართ. ურეკში აქვეა სადგური, ვჯდები მატარებელზე, მივდივარ გადაღებაზე და მეორე დღეს უკანაც მატარებლით ვბრუნდები.
- მოკლედ, ცხოვრების სხვა ტალღაზე გადასულხარ...
- ასე გამოვიდა... ჩვენი სახლიდან 150 მეტრში დენდროლოგიური პარკია, იმის შემდეგ "მუსიკოსთა პარკი", აქეთ "წვერმაღალას პარკი", "ციცინათელა", "მინიატიურების პარკი“, ასევე „ბლექსი-არენა,“ წარმოიდგინეთ, - პატარა ქვეყანაა. რაღაც სხვა კუნძულია და იმდენად მსიამოვნებს აქ ყოფნა, ვერ წარმოიდგენთ. საღამოობით, ველოსიპედით რამდენჯერ გადავსულვარ "მუსიკოსების პარკში", სასიამოვნო გარემო, სიმშვიდე და სიწყნარეა, - სხვაგან სად უნდა წახვიდე?! გართობა რომ მომენატრება, აქვე ბათუმი და ჩავირბენ პარასკევს და ეგ არის... მორჩა, ახლა ჩვენი ოჯახი ნელ-ნელა აქეთ ვბარგდებით საქმითაც და საცხოვრებლადაც. ერთადერთი - ბავშვები თბილისში სკოლაში რომ დადიან, მთლიანად გადმოსვლა ამიტომ ფერხდება.
- კომერციული ამბით კმაყოფილები ხართ? პანდემიამ ხელი ხომ არ შეგიშალათ?
- სასტუმრო პანდემიის წელს გავხსენით, მიუხედავად ამისა, ცარიელი არ ყოფილა. ვიზიტორების რიცხვმა ზამთარშიც მოიმატა. აქ მოსვლის მსურველები, ტურისტები არიან. თუ წვიმა არ არის, ცუდი ამინდები არ იცის. ამინდის მხრივ ყველაზე ცუდი თვე თებერვალია. იანვარშიც თუ 13-14 გრადუსია, ძალიან თბილა, მაგ დროს გარეთ მაისურითაც მივლია. აქ რომ მოძრაობ, დადიხარ, თან, მზეც რომ აჭერს, ისეთი სიცხეა ხოლმე, გაოცდებით. ამიტომ ამ სიწყნარეში უმეტესად წყვილები მოდიან, უიკენდებზე ოჯახებით ჩამოდიან. შესაბამისად, სულ დატვირთულია. ადამიანებს ოჯახთან ერთად, სუფთა ჰაერზე, მშვიდ გარემოში ყოფნა ურჩევნიათ. ასე რომ, აქაურობა ნელ-ნელა ზამთრის კურორტიც ხდება. მაგარი "საკაიფოა", - ზამთარში ზღვის პირას სითბოში ჯდომა...
- მანდ დასახელების მიზეზი, როგორც გაირკვა, მაინც მამუკა ღლონტთან სტუმრობა გახდა და კაპროვანში დასახლების იდეაც მაშინ გაჩნდა. შენ და ბატონი მამუკა მეგობრები იყავით, ახლა უკვე მეზობლებიც ხართ. რას გვეტყვი, მეზობელზე?
- რეალითიშოუმდე („ამტანი“) მეგობრები არ ვყოფილვართ. პროექტი რომ დამთავრდა, მერე დავმეგობრდით, რადგანაც ჩვენი გზები, ცხოვრების სხვადასხვა ეტაპზე, ბევრჯერ გადაიკვეთა... მანამდეც ძალიან მიყვარდა და დამეგობრება-დაძმაკაცების მერე, მეტად. ჩემთვის ერთ-ერთი სამაგალითო ადამიანია თავისი ცხოვრებით, მორალით, პრინციპებით... ერთეული ადამიანები არიან, ვისაც რაღაცებში ვეთანხმები. მამუკას აზრი ყველა საკვანძო საკითხზე ჩემთვის მისაღებია. ძალიან დიდ პატივს ვცემ. ისე მოხდა, რომ აქაც ერთად აღმოვჩნდით. ხშირად ყოფილა, რომ ამხელა კაპროვანში მხოლოდ მე და მამუკა ვყოფილვართ მთელი ზამთარი...
- როგორია უახლოესი გეგმები?
- გეგმები გვაქვს, მაგრამ მთავარია ქვეყანაზე მშვიდობა, ასევე ჯანმრთელობა. ადამიანებისთვის, კაცობრიობისთვის, სამყაროსთვის - ეს მნიშვნელოვანია. ყველას ვუსურვებ, მათ შორის, უსარგებლო ტიპებსაც, სასარგებლო საქმე ნახონ. სცადონ მიწასთან რაღაც. ძალიან მოეწონებათ. ქვეყნისთვისაც კარგი იქნება. გარისკვა ღირს და ჯობს.