ავტორი:

"ეს ჩემი შვილი, დიმკაა, რომანტიკოსი, ფილოსოფოსი, ფოტოგრაფი სამხედრო პოლკ "აზოვიდან, დაე, მთელმა მსოფლიომ ნახოს და იცოდეს..." - რუსების ტყვეობაში მყოფი დმიტრი კოზაცკის დედა

"ეს ჩემი შვილი, დიმკაა, რომანტიკოსი, ფილოსოფოსი, ფოტოგრაფი სამხედრო პოლკ "აზოვიდან, დაე, მთელმა მსოფლიომ ნახოს და იცოდეს..." - რუსების ტყვეობაში მყოფი დმიტრი კოზაცკის დედა

უკრაინის ეროვნული გვარდიის "აზოვის" სპეცდანიშნულების პოლკის პრესსამსახურის ფოტოგრაფი დმიტრი კოზაცკი რამდენიმე დღის წინ მთელმა მსოფლიომ გაიცნო. მებრძოლმა "აზოვსტალის“ ქარხნის ტერიტორიაზე გადაღებული ვიდეო გამოაქვეყნა, რომელშიც "ევროვიზიაზე“ გამარჯვებულ უკრაინულ სიმღერას "სტეფანიას" ასრულებდა.

რამდენიმე დღეში, უკრაინის ხელისუფლების გადაწყვეტილების შემდეგ, "აზოვსტალის" მეტალურგიულ ქარხანაში მყოფი ყველა მებრძოლი რუსეთს ჩაბარდა. კოზაცკიმ აზოვსტალში გადაღებული უკანასკნელი ფოტოები და ვიდეო გამოაქვეყნა და დაწერა:

"სულ ესაა... "აზოვსტალო", გმადლობ თავშესაფრისთვის - ჩემი სიკვდილისა და ჩემი სიცოცხლის ადგილო".

ახლა კოზაცკი რუსეთის ტყვეა. მებრძოლის დედა ირა იუშენკო სოციალურ ქსელში შვილის ფოტოებს აქვეყნებს და ხალხს სთხოვს, ვინც იცნობენ მის შვილს, დაწერონ, როგორია დიმკა, დაწერონ ის, რომ მისი შვილი ნეონაცისტი არ არის და რუსული მედია მას ამ ყველაფერს აბრალებს...

ირა იუშენკო:

"ეს ჩემი შვილი, დიმკაა, რომანტიკოსი, ფილოსოფოსი, ფოტოგრაფი... სამხედრო პოლკ "აზოვიდან". რუსული ტელევიზია ძალიან ცდილობს მათ დააბრალონ, რომ ნეონაცისტები არიან. ვინ იცნობთ დიმკას, ორიოდე სიტყვით დაახასიათე იგი. დაე, მთელმა მსოფლიომ ნახოს და იცოდეს..."

ირა იუშენკოს პოსტს სოციალურ ქსელში უკვე 1700 კომენტარი აქვს, 28 ათასი გაზიარება და 14 ათასზე მეტი რეაქცია მოჰყვა, ადამიანები ყველა ქვეყნიდან წერენ კომენტარებს და მებრძოლის დედას ამხნევებენ.

გთავაზობთ რამდენიმე მათგანს:

"მე არ ვიცნობ თქვენს შვილს, მაგრამ მთელი გულით და სულით მადლობელი ვარ მისი, რადგან ის იცავდა და აგრძელებს ჩვენი უკრაინის დაცვას! ის გმირია! და ქედს ვიხრი თქვენს წინაშე ასეთი შვილისთვის!“

"თქვენი შვილის დახასიათებას არ სჭირდება მისი პირადად გაცნობა, მისი ფოტოები მოგვითხრობს მასზე. თითოეული მათგანი არის შედევრი, რომელიც დარჩება ისტორიას. მხოლოდ ნამდვილ ხელოვანს, დიდი გულის მქონე ადამიანს შეუძლია, ასე დახვეწილად აღბეჭდოს და გადაიტანოს ემოციები ფოტოზე“.

"მე პირადად ვიცნობ დიმიტრის, როგორც ახლობლის შვილს. თუმცა მისი თვალები (სულის სარკე) ანათებს სიკეთით და სიყვარულით ყველა ცოცხალი არსების მიმართ! და ასეთი გულწრფელი ღიმილი შეიძლება მხოლოდ კარგ და პოზიტიურ ადამიანს ჰქონდეს. და მისი შესრულებული "სტეფანია" ჩვენს გულებშია...“

"როგორ არ უნდა ეცადოს მტერი, რომ ჩვენი გმირები გააშავოს, ისინი ჩვენთვის წმინდანი არიან! ვაჟკაცობის, გმირობის, პატრიოტიზმის, კაცობრიობის განსახიერება...“

"შენს დიმიტრის მხოლოდ დაუსწრებლად ვიცნობ. როგორც ჩანს, დიდი ხანია ვიცნობ. დაე, იმ არსებებმა თქვან რაც უნდათ, ჩვენ ვიცით სიმართლე! და ყოველივე იმის შემდეგ, რაც მოხდა, ამ ფოტოს შემდეგ აყვავებული ხის ფონზე, ჩვენ ზუსტად ვიცით, რომ ის ვერ უნდა გატეხონ, დააშინონ. ის არის მთავარი ადამიანი, ვისზეც ჩვენი ერი ამდენი საუკუნის განმავლობაში დგას, მიუხედავად ყველა განსაცდელისა. ეს ნიშნავს, რომ თქვენ შეუვალი ხართ. მინდა,მალე ვნახო დიმკას გაზიარებული ახალი ფოტო. ჩვენ ყველას გვინდა ვნახოთ მალე მისი ღიმილი. დაე, ეს უფრო სწრაფად მოხდეს!..“

"შენი შვილის თვალები და ღიმილი თავისთავად ლაპარაკობს მასზე, ძალიან სუფთა, დიდი სულით და მამაცი გულით. მისი ფოტოები ასევე ბრწყინვალეა, ის ასე დახვეწილად ამჩნევს ადამიანების ცხოვრებას და სულს. ჩვენ აღფრთოვანებულები ვართ. უფალი მოწყალეა და შვილს დაგიბრუნებს. უნდა გჯეროდეს და ილოცო, დედის ლოცვა ძალიან ძლიერია...“

იხილეთ ასევე: