"მაშინ, როცა ვლადიმერ პუტინი დიზაინერების ძვირიან სამოსს ატარებს, უკრაინის პრეზიდენტი ვოლოდიმირ ზელენსკი ტანსაცმელს ისეთ მაღაზიებში იძენს, სადაც უბრალო ხალხი ყიდულობს", - ამბობს უკრაინული ბრენდის, M-TAC-ის წარმომადგენელი, ტარას რუდნიცკი.
ეს სწორედ ის ბრენდია, რომლის წარმოებული მწვანე ქურთუკიც, ომის პერიოდში ზელენსკის აცვია, რამაც მასზე მოთხოვნა გაზარდა.
რუდნიცკი Insider-თან ინტერვიუში ამბობს, რომ ქურთუკის შესაძენად თხოვნა მსოფლიოს მრავალი ქვეყნიდან მისდით.
M-TAC ქურთუკებს უკრაინაში კერავს. ბოლო თვეებში ცდილობენ, რომ მხოლოდ სამხედროებისთვის აწარმოონ ისინი, რადგან კომპანიას მატყლის მარაგი თითქმის ამოეწურა: "ვიმედოვნებთ, რომ ოდესმე კვლავ შევავსებთ მარაგს, ეს ომში ჩვენი გამარჯვების შემდეგ მოხდება, ამჟამად შეუძლებელია", - ამბობს რუდნიცკი და ამატებს, რომ საომარი მოქმედებები ართულებს ნებისმიერი ტიპის წარმოების გაგრძელებას.
კომპანიის წარმომადგენელი ინტერვიუში ამბობს: "ზელენსკი ახლა როკ ვარსკვლავივითაა და ამით აიხსნება ის, თუ რატომ უნდა ამდენ ადამიანს, რომ მასავით ეცვას".
კონფლიქტის დაწყების შემდეგ, მოთხოვნა M-TAC-ის წარმოებულ სხვა ნივთებზეც გაიზარდა. რუდნიცკიმ თქვა, რომ მათი პროდუქცია პრაქტიკული და ფუნქციონალურია.
5 მაისს, ლონდონში, უკრაინის საელჩოს მიერ გამართულ საქველმოქმედო ფონდის ღონისძიებაზე, ზელენსკის ერთ-ერთი M-TAC-ის ქურთუკი, რომელსაც მან ხელიც მოაწერა, 90 000 ფუნტ სტერლინგად (110 000 აშშ დოლარი) გაიყიდა. დიდი ბრიტანეთის პრემიერ-მინისტრმა, ბორის ჯონსონმა მოუწოდა დამსწრეებს, რომ რაც შეიძლება მეტ თანხას ჩამოსულიყვნენ აუქციონზე, რათა უკრაინის დასახმარებლად საკმარისი რაოდენობის თანხა შეეგროვებინათ.
წყარო: businessinsider
მოამზადა: ანა სიბოშვილმა