თავდასხმა ტეხასის დაწყებით სკოლაზე, სადაც 5-დან 11 წლამდე ბავშვები სწავლობდნენ - გარდაცვლილია 21 ადამიანი, მათ შორის, 19 ბავშვი
აშშ-ში, ტეხასის შტატში, ქალაქ უვალდეს ერთ-ერთ დაწყებით სკოლაში სროლის შედეგად, ბოლო ინფორმაციით 21 ადამიანი გარდაიცვალა, რომელთა შორისაც 19 ბავშვია, ხოლო 2 - ზრდასრული.
ასევე გარდაცვლილია თავდამსხმელი, 18 წლის მამაკაცი. როგორც მედია წერს, ის პოლიციელის მიერ გახსნილი ცეცხლის შედეგად დაიღუპა.
გამოძიების პროცესში ჩართულია გამოძიების ფედერალური ბიურო (FBI). დაწყებით სკოლაში ხუთიდან თერთმეტ წლამდე ასაკის მოსწავლეები სწავლობდნენ.
- როგორც თეთრი სახლის პრესმდივანი, კარინე ჟან-პიერი "ტვიტერის“ გვერდზე დაწერა, პრეზიდენტ ბაიდენს ტეხასის დაწყებით სკოლაში მომხდარი სროლის შესახებ ეცნობა.
მისი თქმით, ქვეყნის პირველ პირს რეგულარულად მიაწვდიან განხორციელებულ თავდასხმაზე ინფორმაციას.
"პრეზიდენტი ლოცულობს ამ საშინელი მოვლენის შედეგად დაზარალებული ოჯახებისთვის. ის დღეს საღამოს, როდესაც თეთრ სახლში დაბრუნდება, განცხადებას გააკეთებს“, - დასძინა ჟან-პიერმა.
- მომხდარ ტრაგედიას გამოეხმაურა აშშ-ის ექსპრეზიდენტი, ბარაკ ობამა:
"მშობლები აწვენენ შვილებს საწოლებში, უკითხავენ ზღაპრებს, უმღერიან იავნანას - და გონებაში ისინი წუხან იმაზე, თუ რა შეიძლება მოხდეს ხვალ მას შემდეგ, რაც ბავშვებს სკოლაში, სასურსათო მაღაზიასა, თუ სხვა საჯარო სივრცეში წაიყვანენ.
სენდი ჰუკიდან თითქმის ათი წლის შემდეგ - და ბუფალოდან ათი დღის შემდეგ - ჩვენი ქვეყანა პარალიზებულია არა შიშით, არამედ იარაღის ლობით და პოლიტიკური პარტიით, რომლებმაც არ გამოავლინეს მზადყოფნა რაიმე გზით იმოქმედონ, რაც ხელს შეუწყობს ამ ტრაგედიების თავიდან აცილებას. უკვე დიდი ხანია არის მოქმედების, ნებისმიერი სახის ქმედების დრო,“- წერს ყოფილი პრეზიდენტი "ტვიტერის" ოფიციალურ გვერდზე.