"ვიდრე ჩაბარებულებს სათანადოდ არ გაასამართლებენ, მანამდე საუბარი ნაადრევია" - რას აცხადებს რუსეთის საგარეო უწყება უკრაინასთან ტყვეების გაცვლის თაობაზე
მოსკოვსა და კიევს შორის ტყვეების გაცვლის საკითხზე საუბარი მხოლოდ ჩაბარებული უკრაინელი „ბოევიკების“ სასამართლო პროცესის შემდეგ იქნება შესაძლებელი,- ამის შესახებ რუსეთის ფედერაციის საგარეო საქმეთა მინისტრის მოადგილემ, ანდრეი რუდენკომ განაცხადა, რითაც ის გამოეხმაურა უკრაინის გენერალური პროკურორის, ირინა ვენედიქტოვას განცხადებას რუსი სამხედრო მოსამსახურის, ვადიმ შიშიმარინის შესაძლო გაცვლის შესახებ.
"ყველაფერს განვიხილავთ მას შემდეგ, რაც ჩაბარებულებს სათანადოდ გაასამართლებენ, შემდეგ შეიძლება სხვა ნაბიჯების გადადგმა. მანამდე ყველა საუბარი გაცვლაზე ნაადრევია“, - აღნიშნა მინისტრის მოადგილემ.
ცნობისათვის, უკრაინის გენერალურმა პროკურორმა, ირინა ვენედიქტოვამ მედიასთან საუბარში განაცხადა, რომ რუსი ჯარისკაცი ვადიმ შიშიმარინი, რომელსაც, უკრაინის სასამართლომ, ომის წეს-ჩვეულებების დარღვევისთვის სამუდამო პატიმრობა მიუსაჯა, შესაძლებელია გაცვალონ. „შესაძლებელია მისი გაცვლა, პირის გაცვლა სასამართლოს განაჩენის შემდეგ შეიძლება. ეს ტექნიკურად შესაძლებელია,“- აღნიშნა გენერალურმა პროკურორმა.