"მოგმართავთ თხოვნით, მიიღოთ იმგვარი გადაწყვეტილება, რომლითაც არ დაისჯება ჩემი ხალხი - ამაყი და თავისუფალი ქართველები... ალტერნატივა მხოლოდ რუსეთია" - ნიკა გვარამიას წერილი ევროპას
"მთავარი არხის" გენერალური დირექტორი ნიკა გვარამია რუსთავის მე-12 პენიტენციური დაწესებულებიდან წერილს ავრცელებს, სათაურით: "ნიკა გვარამიას წერილი ევროპას, რუსთავის მე-12 პენიტენციური დაწესებულების 212-ე საკნიდან", რომელიც "ფეისბუქის" მის პირად გვერდზე გამოქვეყნდა.
როგორც გვარამია წერს, აღნიშნული წერილის ადრესატები არიან:
რობერტა მეცოლა - ევროპარლამენტის პრეზიდენტი
ურსულა ფონ დერ ლაიენი - ევროპული კომიისიის პრეზიდენტი
შარლ მიშელი - ევროპული საბჭოს პრეზიდენტი
ევროპარლამენტის წევრები:
ანდრიუს კუბილიუსი
ანა ფოტიგა
მარკეტა გრეგოროვა
მაიკლ გალერი
პეტრას აუსტრევიჩუსი
რასა იუკნევიჩიენე
რაფაელ გლუკსმანი
სვენ მიკსერი
ვიოლა ფონ კრამონი
"ძვირფასო და ნამდვილო მეგობრებო, ჩემი ქვეყნის მთავარო გულშემატკივრებო, საქართველოს ისტროიული სამშობლოს, ევროპის ღირსეულო შვილებო! მოგმართავთ რუსთავის მე-12 პენიტენციური დაწესებულების 212-ე საკნიდან. მოგმართავთ ჩემი, ჩემი მეუღლის - სოფიას, ჩემი შვილების - სანდროს, ქეთევანის და გიკოს სახელით, მოგმართავთ ჩემი მეორე ოჯახის - "მთავარი არხის" სახელით, მოგმართავთ ჩემი სამშობლოს ყველა გულმხურვალე პატრიოტის სახელით. მოგმართავთ უმორჩილესი თხოვნით, რომ მიიღოთ იმგვარი გადაწყვეტილება, რომლითაც არ დაისჯება ჩემი ხალხი - ამაყი და თავისუფალი ქართველები. ცივილიზაციური არჩევანი ჩვენ გაკეთებული გვაქვს - ჩვენი ადგილი მხოლოდ ევროპაშია, იქ, სადაც ინახება ჩვენი უძველესი და საკაცობრიო სიმბოლო - ოქროს საწმისი. როგორი უნდა იყოს გადაწყვეტილება, თქვენ უკვეთ იცით. მე მხოლოდ ის მინდა გთხოვოთ, რომ საქართველოს ხალხს არ დაეკეტოს გზა ევროპისკენ. არ დაეკეტოს, რადგან ალტერნატივა მხოლოდ რუსეთია. ეს ალტერნატივა კი დამღუპველი იქნება ჩვენთვის და დაასრულებს დამოუკიდებელ საქართველოს ისტორიას.და ბოლოს, უფლება არ მაქვს, როგორც საქართველოს პატრიოტმა და როგორც ადვოკატმა, არ გთხოვოთ, მაქსიმალური ძალისხმევა გასწიოთ მიხეილ სააკაშვილის გადასარჩენად. ქვეყანაში დასავლეთის ყველაზე დიდ გულშემატკივარს, საქართველოს მესამე პრეზიდენტს, სამწუხაროდ, დიდი დრო აღარ აქვს, თუ მისი გადარჩენა სასწრაფოდ არ მოხდა. დიდი იმედით და საუკეთესო სურვილებით" - ვკითხულობთ წერილში.