რუსეთში საქართველოს და უკრაინის ოკუპირებული რეგიონების ე.წ. საფეხბურთო ჩემპიონატის შექმნაზე საუბრობენ - რა აბრკოლებთ და რამდენად დიდია ამ გეგმის განხორციელების შანსი?
რუსულ მედიაში აქტიურად დაიწყეს საუბარი უკრაინისა და საქართველოს ოკუპირებულ ტერიტორიებზე არსებულ საფეხბურთო კლუბებს შორის ჩემპიონატის შექმნის შესახებ.
როგორც გამოცემა РБ Спорт-ი წერს, განიხილება საფეხბურთო ჩემპიონატის შექმნის შესაძლებლობა ყირიმის, დონეცკის, ლუგანსკის, ხერსონის, მელიტოპოლისა და აფხაზეთის გუნდების მონაწილეობით.
- "ეს იმით არის განპირობებული, რომ უახლოეს მომავალში, ამ არეალიდან, ჯერჯერობით, ვერც ერთი კლუბი ვერ გახდება РФС-ის (რუსეთის ფეხბურთის კავშირი) წევრი უეფასთან არსებული დაპირისპირების გამო. თუმცა ერთიანი ჩემპიონატის შექმნაც არ იქნება მარტივი მანამდე, სანამ ამ ტერიტორიებზე უსაფრთხოების ნორმები არ იქნება დაცული“, - ნათქვამია სტატიაში.
პუბლიკაციის მიხედვით, ამ თემაზე დისკუსია უკვე გაიმართა და მომდევნო შეხვედრა მოსკოვში, 12 ივნისისთვისაა ჩანიშნული.
აღსანიშნავია, რომ აქამდე თვითგამოცხადებული დონეცკის რესპუბლიკის "ხელმძღვანელმა", დენის პუშალინმა განაცხადა, რომ მას ჰქონდა "დონეცკის შახტარის" აღდგენის გეგმა. ასევე გავრცელდა ინფორმაცია, რომ შესაძლოა, აფხაზური საფეხბურთო კლუბი შეუერთდეს რუსულ საფეხბურთო ლიგას, თუმცა ამის შესაძლებლობაც ჯერჯერობით მცირეა.
- როგორც აფხაზეთის ე.წ. საფეხბურთო ფედერაციის ხელმძღვანელი ტარას ხარბა აცხადებს, თუ აფხაზური კლუბი შეუერთდება რუსულ ლიგას, ეს კლუბი აუცილებლად აფხაზეთში უნდა იყოს დაფუძნებული.
მისივე განმარტებით, სოჭის ხელმძღვანელობამ მათ შესთავაზა საფეხბურთო კლუბის სოჭში დაფუძნება, რომელიც მონაწილეობას მიიღებდა რუსეთის ჩემპიონატში, სამართლებრივი ნორმების გვერდის ავლით. "ჩვენთვის ფუნდამენტურად მნიშვნელოვანია, რომ აფხაზეთში დაფუძნებული კლუბი მონაწილეობდეს ჩემპიონატში“, - ამბობს ხარბა.
ამასთან, რუსეთის საფეხბურთო კავშირის პრეზიდენტი ვიაჩესლავ კოლოსკოვი ამბობს, რომ ყირიმისა და აფხაზეთის გუნდების რუსეთის ჩემპიონატში ჩართვა, ამ დროისთვის შეუძლებელია.
ამის თაობაზე განცახდება გააკეთა უკრაინის პრეზიდენტმა ვოლოდიმირ ზელენსკიმ.
"ოკუპანტებმა გამოაცხადეს აბსოლუტურად გიჟური ამბავი, რომ ისინი ემზადებიან ოკუპირებული ტერიტორიიდან - დონეცკიდან, ლუგანსკიდან, ხერსონიდან, მელიტოპოლიდან, ყირიმიდან და საქართველოს ნაწილიდანაც კი, საფეხბურთო კლუბები ფსევდო ჩემპიონატისთვის გააერთიანონ,“ - აღნიშნა მან.
მან ამ გადაწყვეტილებას უკრაინელი ხალხის "დაცინვა" უწოდა. პრეზიდენტის თქმით, ამ ტერიტორიებისთვის, ამ ქალაქებისთვის ნორმალური ცხოვრება მხოლოდ უკრაინის დაბრუნება, მისი დროშა და კანონი იქნება.
იხილეთ ასევე: