"ძალიან ვწუხვარ... თქვენი ხელისუფლება რუსეთის მძევლად იქცა... უკრაინა ყოველთვის დაგეხმარებათ, უკრაინა თქვენი ყველაზე დიდი ადვოკატია" - გონჩარენკო ქართველ ხალხს
ევროკომისიამ ევროკავშირის წევრობის კანდიდატის სტატუსის მინიჭებაზე უკრაინასა და მოლდოვას რეკომენდაცია მისცა, თუმცა საქართველოს - არა. როგორც ევროკომისიის პრეზიდენტმა, ურსულა ფონ დერ ლაიენმა განაცხადა, საქართველო მიიღებს კანდიდატის სტატუსს გარკვეული პირობების დაკმაყოფილების შემთხვევაში.
გადაწყვეტილებას სოციალურ ქსელში უკრაინელი პოლიტიკოსი ოლექსეი გონჩარენკო ეხმიანება და საქართველოს შესახებ წერს:
"ძალიან ვწუხვარ და განაწყენებული ვარ - ეს გადაწყვეტილება მიიღეს საქართველოს ხელისუფლების გამო, ქართული ელიტის პოზიციის გამო და არა ქართველი ხალხის გამო. თქვენ დაამტკიცეთ, რომ უნდა იყოთ და იქნებით ევროპული საზოგადოების ნაწილი.
თქვენ ყველაფერი გააკეთეთ, აკეთებთ უკრაინის დასახმარებლად და აგრძელებთ უკრაინის დახმარებას. თქვენი მებრძოლები უკრაინაში ჩვენთან ერთად იბრძვიან რუსეთის წინააღმდეგ, ბევრი უკრაინელი შეიფარეთ სახლში და დადიხართ უკრაინის სოლიდარობისა და მხარდამჭერ აქციებზე.
მაგრამ თქვენი ხელისუფლება რუსეთის მძევლად იქცა, პუტინის მძევლად, კრემლის მძევლად და თქვენ გაქვთ მხოლოდ ერთი სწორი გზა, აირჩიოთ მთავრობა, რომელიც რუსეთის ჭკუაზე არ ივლის, რომელიც დააბრუნებს საქართველოს ევროინტეგრაციის გზაზე, მთავრობა, რომელიც გაატარებს არა პირად ბიზნეს ინტერესებს, არამედ საქართველოს ინტერესებს.
მე მჯერა, რომ თქვენ ამას შეძლებთ, უკრაინა თქვენთანაა, უკრაინა ყოველთვის დაგეხმარებათ, უკრაინა თქვენი ყველაზე დიდი ადვოკატია.
დიდება საქართველოს, დიდება უკრაინას", - წერს გონჩარენკო.