"ათიათასობით ქართველი ევროინტეგრაციის მხარდასაჭერად თბილისის ქუჩებში გამოვიდა" - როგორ ეხმიანება უცხოური მედია 20 ივნისის აქციას

თბილისში 20 ივნისს ევროინტეგრაციის მხარდასაჭერად მასშტაბური აქცია, "შინ ევროპისკენ" გაიმართა. აქციაზე შეკრებილებს ვიდეოჩართვის საშუალებით მიმართეს ევროპელმა პოლიტიკოსებმა, ქართველმა საზოგადოებამ კი კიდევ ერთხელ გამოხატა ევროპული მომავლის სურვილი. დედაქალაქში გამართული აქცია გააშუქეს დასავლურმა მედიასაშუალებებმა.

"ევროკავშირში გაწევრების მხარდასაჭერად ქუჩებში ათიათასობით ქართველი გამოვიდა მას შემდეგ, რაც ევროპულმა კომისიამ თბილისისთვის კანდიდატის სტატუსის მინიჭების გადადების რეკომენდაცია გასცა", - წერს სააგენტო "ფრანს-პრესი."

• "საქართველოს, უკრაინისა და ევროკავშირის დროშების ფრიალით, საქართველოს პარლამენტის წინ, აქციაზე სახელწოდებით "წინ ევროპისკენ“, დაახლოებით 60 000 დემონსტრანტი შეიკრიბა,“ - წერს გამოცემა.

მათი შეფასებით, საქართველოს ევროკავშირსა და ნატო-ში გაწევრების მცდელობა, რომელიც გათვალისწინებულია ქვეყნის კონსტიტუციით, დიდი ხანია აღიზიანებს კრემლს და დაძაბულობამ კულმინაციას 2008 წელს მიაღწია, როდესაც რუსეთი საქართველოში შეიჭრა.

• “ევრონიუსის“ ცნობით, თბილისში გამართული აქციის მიზანი ბრიუსელისთვის სიგნალის გაგზავნა იყო იმ ფონზე, როცა ევროკავშირის ლიდერებმა ამ კვირაში უნდა განიხილონ, მიენიჭოს თუ არა კანდიდატის სტატუსი საქართველოს, უკრაინასა და მოლდოვას.

გამოცემა წერს, რომ ევროპულმა კომისიამ რეკომენდაცია გაუწია საქართველოსთვის "ევროკავშირში გაწევრიანების პერსპექტივის" შეთავაზებას, სტატუსის, რომელსაც იურიდიული ღირებულება არ აქვს.