ავტორი:

ფოტოები ამბროლაურიდან, სადაც მთელი ღამე სტიქიას ებრძოდნენ - "70-80 წლის ადამიანები ამბობენ, რომ მსგავსი რამ არ უნახავთ - ათწლოვანი ხეები ძირიანად არის მოგლეჯილი"

ფოტოები ამბროლაურიდან, სადაც მთელი ღამე სტიქიას ებრძოდნენ - "70-80 წლის ადამიანები ამბობენ, რომ მსგავსი რამ არ უნახავთ - ათწლოვანი ხეები ძირიანად არის მოგლეჯილი"

რაჭა-ლეჩხუმ ქვემო სვანეთის სახელმწიფო რწმუნებულის პაპუნა მარგველიძის ინფორმაციით, სტიქიამ ამბროლაურის მუნიციპალიტეტის 6 სოფელში საგზაო ინფრასტრუქტურა, მრავალწლიანი ნარგავები და ელექტროენერგიის გადამცემი ანძები დააზიანა. ამასთან, ძლიერმა ქარმა რამდენიმე საცხოვრებელ სახლს სახურავი გადახადა.

როგორც პაპუნა მარგველიძემ AMBEBI.GE-სთან საუბრისას აღნიშნა, ცაგერის მუნიციპალიტეტის სოფელ ლაჯანაში, უხვი ნალექის შედეგად მეწყრული პროცესები გააქტიურდა, რასაც საგზაო მოძრაობის შეფერხება მოჰყვა.

სახელმწიფო რწმუნებულის განცხადებით, რეგიონში შექმნილია კომისია, რომელიც მიყენებულ ზარალს დაითვლის.

"სტიქიურმა მოვლენებმა პრობლემები მთელ რეგიონს შეუქმნა. ვიყავით ცაგერის მუნიციპალიტეტის სოფელ ლაჯანაში, სადაც უხვი ნალექის შედეგად მეწყრული პროცესები ისევ გააქტიურდა. მიწის მასამ გადაკეტა დამაკავშირებელი გზა, რის შემდეგაც შეფერხდა მოძრაობა. დილიდანვე ინტენსიურ რეჟიმში მიმდინარეობდა გაწმენდითი სამუშაოები და უკვე აღდგენილია მოძრაობა.

ასევე, პრობლემები შეგვექმნა ამბროლაურის მუნიციპალიტეტში, 6 სოფელში დაზიანდა საგზაო ინფრასტრუქტურა, მრავალწლიანი ნარგავები, დაიტბორა სავარგულები, დაზიანდა ელექტროენერგიის გადამცემი ხაზები და ანძები.

ძლიერმა ქარმა რამდენიმე სახლს გადაუხადა სახურავი, გუშინვე მოხდა რამდენიმეს დახურვა და ამ მხრივ სამუშაოები კვლავ გრძელდება. შეიქმნა კომისია, რომელიც აგრძელებს ზარალის დათვლას, რომელსაც უახლოეს მომავალში დავადგენთ" - აღნიშნა პაპუნა მარგველიძემ.

გუშინ ადგილზე გადაღებული კადრები სოციალურ ქსელში გაავრცელა ჟურნალისტმა ინგა მურუსიძემ, რომელიც წერს:

"70-80 წლის ადამიანები ამბობენ, რომ მსგავსი რამ არ უნახავთ - ათწლოვანი ხეები ძირიანად არის მოთხრილი" - წერს მურუსიძე.

ფოტოები: ამბროლაურის მუნიციპალიტეტის მერია