ავტორი:

"ტრაილერს არ ჰქონდა კონდიციონერი, არც სასმელი წყალი... უკეთესი ცხოვრებისთვის გზებს ეძებდნენ" - რა ახალი დეტალები ხდება ცნობილი აშშ-ში მანქანაში ნაპოვნ ათობით გარდაცვლილ მიგრანტზე

"ტრაილერს არ ჰქონდა კონდიციონერი, არც სასმელი წყალი... უკეთესი ცხოვრებისთვის გზებს ეძებდნენ" - რა ახალი დეტალები ხდება ცნობილი აშშ-ში მანქანაში ნაპოვნ ათობით გარდაცვლილ მიგრანტზე

ტეხასის შტატის ქალაქ სან ანტონიოს გარეუბანში, მიტოვებულ სატვირთო მანქანაში სულ მცირე 46 გარდაცვლილი იპოვეს, ინფორმაციას BBC ავრცელებს. სახანძრო სამსახურის წარმომადგენელმა განაცხადა, რომ 16 ადამიანი, მათ შორის ოთხი ბავშვი, საავადმყოფოში გადაიყვანეს.

სან ანტონიო, რომელიც აშშ-მექსიკის საზღვრიდან 250 კილომეტრშია, მთავარი სატრანზიტო გზაა ადამიანებით კონტრაბანდისტებისთვის.

ადამიანებით მოვაჭრეები ხშირად იყენებენ სატვირთო მანქანებს უსაბუთო, არალეგალი მიგრანტების გადასაყვანად.

"მათ ჰყავდათ ოჯახები და სავარაუდოდ, უკეთესი ცხოვრებისთვის გზების პოვნას ცდილობდნენ. ეს საშინელი ტრაგედიაა", - ამბობს სან ანტონიოს მერი.

ტრაგიკულ სურათზე ქალაქის სახანძრო სამსახურის ხელმძღვანელმაც ისაუბრა.

"არცერთი ჩვენგანი არ მოდის სამსახურში იმის წარმოდგენით, რომ სატვირთო მანქანის გაღებისას, ათობით ცხედარს ნახავს", - ამბობს ის.

მისი ინფორმაციით, ავტომობილს, რომელიც მძღოლმა მიატოვა, არ ჰქონდა კონდიციონერი და ასევე იქ არც სასმელი წყალი იყო. სან ანტონიოს კლიმატი ზაფხულის თვეებში საშინლად ცხელია, ორშაბათს, ტემპერატურა 40 გრადუსს აღწევდა და სავარაუდოა, რომ გარდაცვლილები სიცხესა და გაუწყლოებას ემსხვერპლნენ.

სამართალდამცავებმა სამი ადამიანი დააკავეს. მექსიკის საგარეო საქმეთა მინისტრმა, მარსელო ებრარდმა განაცხადა, რომ საავადმყოფოში გადაყვანილთა შორის ორი გვატემალელია, დანარჩენების ეროვნება კი ჯერჯერობით უცნობია.

ერთ-ერთი ადგილობრივი, ედუარდ რეინა ამბობს, რომ ხშირად ხედავს მიგრანტებს ზუსტად იმ ადგილას, სადაც სატვირთო მანქანა იპოვეს: "ვფიქრობდი, რომ ადრე თუ გვიან ვინმე დაშავდებოდა. კარტელები, რომლებსაც ისინი შემოჰყავთ, საერთოდ არ ზრუნავენ მათზე".

დაცვის თანამშრომელი, ედუარდ რეინა

ტეხასის რესპუბლიკელმა გუბერნატორმა, გრეგ ებოტმა მიგრანტების გარდაცვალებაში ჯო ბაიდენი დაადანაშაულა და თქვა, რომ "ეს მისი ღია საზღვრების პოლიტიკის მომაკვდინებელი შედეგია".

აშშ-ში მიგრაცია სადავო პოლიტიკური საკითხია. მხოლოდ მაისში, 239 000 უსაბუთო მიგრანტი შევიდა მექსიკიდან. ბევრი მათგანი უკიდურესად სარისკო და სახიფათო მარშრუტით გადაადგილდებოდა.

ცენტრალურ ამერიკაში სიღარიბისა და ძალადობისგან გაქცევის მიზნით, ბევრი არალეგალი მიგრანტი კონტრაბანდისტებს დიდ თანხას უხდის აშშ-ის საზღვარზე გადასაყვანად.

წყარო: bbc

მოამზადა: ანა სიბოშვილმა