"ომის განმავლობაში ყველაზე ფართომასშტაბიანი ტყვეთა გაცვლა" - უკრაინული მხარის ცნობით, ოკუპანტების ტყვეობიდან 144 სამხედრო გაათავისუფლეს, მათ შორის "აზოვსტალის" 95 დამცველია
უკრაინის თავდაცვის სამინისტროს დაზვერვის მთავარი სამმართველოს ინფორმაციით, რუსეთის სრულმასშტაბიანი შეჭრის შემდეგ, ყველაზე ფართომასშტაბიანი ტყვეთა გაცვლა განხორციელდა, რის შედეგადაც ტყვეობიდან 144 უკრაინელი სამხედრო გაათავისუფლეს, მათ შორის 95 "აზოვსტალის" დამცველია.
ამავე ინფორმაციით, "აზოვსტალის" 95 დამცველს შორის, 43 არის"აზოვის პოლკის" სამხედრო.
ცნობისთვის, რუსულმა ძალებმა ქალაქი მარიუპოლო უკრაინაში შეჭრის შემდეგ, ბლოკადაში მოაქციეს. უკრაინელი სამხედროები მარიუპოლს 80 დღეზე მეტი ხნის განმავლობაში იცავდნენ. რუსი დამპყრობლების მიერ ბლოკირებული „აზოვსტალის“ ქარხნიდან უკრაინელი დამცველების ევაკუაცია 16 მაისს დაიწყო და რამდენიმე დღის განმავლობაში გაგრძელდა.