"ვინც ფული დაკარგეთ, ჩათვალეთ “500 დოლარის ისწავლეთ” - ფინანსური პირამიდები Teslamedia და lyst-ი თანხას აღარ გასცემს
ბოლო პერიოდში საქართველოში სხვადასხვა ე.წ. ციფრული ფინანსური პირამიდებია პოპულარული, რომლებიც მომხმარებელს გარკვეული რაოდენობის თანხის ინვესტირების შემდეგ, ფულის გამომუშავებას ჰპირდება, თუმცა სამწუხაროდ, როგორც ამგვარი პირამიდული სქემით მოქმედების დროს ხდება, მომხმარებლის დიდი ნაწილი ინვესტირებულ თანხასაც ვეღარ იბრუნებს უკან.
საქართველოში ციფრული ბოტასების შემდეგ პოპულარული გახდა tesla media და lyst.
- ამ ფინანსური პირამიდების მიხედვით, მომხმარებელს გადახდილი ფულის შემდეგ, ვიდეოები უნდა ენახა, რაშიც სისტემა გარკვეულ ანაზღაურებას აძლევდა.
დღეს როგორცTesla Media-ს, ასევე lyst-ის მომხმარებელთა დიდი ნაწილი წერს, რომ ისინი თანხას ვეღარ იბრუნებენ და სისტემა ფულის გატანის საშუალებას აღარ აძლევთ.
- თემას სოციალურ ქსელში ეხმიანება ეკონომისტი ოთო აბესაძე და წერს, რომ მოვლენების ასეთი განვითარება მოსალოდნელი იყო.
"სამწუხაროდ, ყველა ჩემი პროგნოზი ახდა (stepen, tesla media, lyst) ყველაფერი ზუსტად ისე დასრულდა როგორც ვწერდი.
არავითარ შემთხვევაში არ შეიძლება “ქილიკი” ესეთ დროს. ადამიანებმა დაკარგეს ფული. არა უშავს. მოდი ესე შევხედოთ, თქვენ ვინც ფული დაკარგეთ, ჩათვალეთ “500 დოლარის ისწავლეთ”
მომავალში სანამ დააპირებთ მსგავს ინვესტიციას, ყოველთვის მიმართეთ თქვენს გარშემო მყოფ ფინანსისტებს, ან მომწერეთ ნებისმიერ დროს. არასოდეს დაგზარდებით გონივრული რჩევისთვის.
ახლა უბრალოდ მარტივად შეხედეთ ამ “მიღებულ განათლებას” და გააგრძელეთ მშვიდად ცხოვრება“, - წერს აბესაძე.
აღსანიშნავია, რომ მსგავსი ფინანსური პირამიდები ფინანსური კუთხით ნაკლებად განვითარებულ ქვეყნებშია პოპულარული. მაგალითად, Google Trend-ის მიხედვით, Teslamedia ყველაზე პოპულარული იყო საქართველოში, სომხეთში, აზერბაიჯანში, ყირგიზეთსა და უზბეკეთში.