იტალიამ, ძლიერი გვალვის გამო, 5 რეგიონში საგანგებო მდგომარეობა გამოაცხადა
იტალიამ, ბოლო 70 წლის განმავლობაში ყველაზე ძლიერი გვალვის ფონზე, ქვეყნის ჩრდილოეთ ნაწილის 5 რეგიონში საგანგებო მდგომარეობა გამოაცხადა, - ინფორმაციას „ევრონიუსი“ ავრცელებს.
გამოცემის ცნობით, საგანგებო მდგომარეობა გამოცხადდა ემილია-რომანიას, ფრიული-ვენეცია-ჯულიას, ლომბარდიის, პიემონტისა და ვენეტოს რეგიონებში.
მინისტრთა საბჭოს მიერ დამტკიცებული ზომა გვალვასთან გასამკლავებლად 36.5 მილიონი ევროს გამოყოფას ითვალისწინებს.
მდინარე პოს ხეობაში, რომელიც აწარმოებს ქვეყნის სურსათის დაახლოებით 40%-ს, მათ შორის ხორბალსა და ბრინჯს, თითქმის ოთხი თვის განმავლობაში ნალექი ძალიან მცირე რაოდენობით მოდის.