მოხუცების ძარცვა საძილე საშუალებების გამოყენებით - საბერძნეთში დააკავეს 48 წლის ქართველი ქალი, რომელსაც ბრალად არაერთი ყაჩაღობა და ქურდობა ედება

ადგილობრივი მედიის ინფორმაციით, საბერძნეთის პოლიციამ დააკავა ქართველი ქალი, რომელიც, ბერძნული საგამოძიებო უწყების მტკიცებით, საძილე მოქმედების სხვადასხვა ნივთიერების გამოყენებით, მოხუცებს ძარცვავდა.

Protothema.gr- ის ცნობით, ბრალდებულია 1974 წელს დაბადებული ე. ქ. მეტსახელად, "ობობა".

როგორც გამოცემა წერს, ქართველი ქალი 26 ივნისს, უშუალოდ დანაშაულის ჩადენისას დააკავეს. მას შემდეგ, დღემდე, ბერძენმა სამართალდამცავებმა გახსნეს ყაჩაღობის 9 და ქურდობის 4 საქმე, რომლებშიც, გამოძიების მტკიცებით, ბრალდებული მონაწილეობდა.

საბერძნეთის სამართალდამცავი ორგანოები საზოგადოებას მოუწოდებენ, კონფიდენციალურობის გარანტიით, შესაბამის ორგანოებს მიაწოდონ ინფორმაცია ე.ქ. - სთან დაკავშირებით, თუ ისინი რაიმე მნიშვნელოვან ცნობებს ფლობენ.