ავტორი:

რუსეთსა და ყაზახეთს შორის ურთიერთობა რთულდება - რუსეთი ყაზახეთს შავი ზღვით ნავთობის ექსპორტს უზღუდავს, ყაზახეთი კი გემის ჩამორთმევით ემუქრება

რუსეთსა და ყაზახეთს შორის ურთიერთობა რთულდება -  რუსეთი ყაზახეთს შავი ზღვით ნავთობის ექსპორტს უზღუდავს, ყაზახეთი კი გემის ჩამორთმევით ემუქრება

რუსეთსა და ყაზახეთს შორის ვითარება მნიშვნელოვნად დაიძაბა. ყაზახეთის პრემიერ-მინისტრ ალიხან სმილოვმა დღეს მინისტრთა კაბინეტის საგანგებო სხდომა მას შემდეგ მოიწვია, რაც ნოვოროსიისკის პრიმორსკის რაიონულმა სასამართლომ კასპიის მილსადენის კონსორციუმის (CPC) საზღვაო ტერმინალის მუშაობა 30 დღით შეაჩერა.

სასამართლოს 5 ივლისის გადაწყვეტილებით, ყაზახეთიდან ევროპაში ნავთობის ტრანზიტი შეწყდა. ნოვოროსიისკის პრიმორსკის რაიონული სასამართლოს გადაწყვეტილების მიზეზად "როსტრანსნადზორის“ მიერ გამოვლენილი დარღვევები დასახელდა, რომლებიც "სახიფათო საწარმოო ობიექტების ტექნიკურ მდგომარეობასა და მათი ექსპლუატაციის დროს გარემოსდაცვითი მოთხოვნების დაცვას“ შეეხება. კერძოდ, "როსტრანსნადზორის“ განცხადებით, საზღვაო ტერმინალში ნავთობი დაიღვარა.

კასპიის მილსადენის კონსორციუმში აცხადებენ, რომ "კანონი კრძალავს ისეთი ღონისძიებების გატარებას, რამაც შესაძლოა, წარმოებისთვის შეუქცევადი შედეგები გამოიწვიოს.“ განცხადებაში, ასევე, ნათქვამია, რომ "სააქციო საზოგადოება, CPC-P უწყვეტი ციკლის საწარმოა და მისი საქმიანობის დაუყოვნებლივ შეჩერებამ შესაძლოა, ტექნიკურ ობიექტზე არახელსაყრელი და უმართავი პროცესი გააჩინოს და განავითაროს, მათ შორის მისი განადგურების ჩათვლით, რადგან ნავთობის ტრანსპორტირების ტექნოლოგიური მოთხოვნა საწარმოო საქმიანობის დაუყოვნებლივ და ერთბაშად შეწყვეტის საშუალებას არ იძლევა.“

ყაზახეთს ნავთობის დიდი მარაგი აქვს, რომლის ექსპორტიც შავი ზღვის ნოვოროსიისკის ტერმინალის გავლით ხდება. CPC ყაზახური ნავთობის ძირითადი საექსპორტო მარშრუტია, რომლის წილიც მილსადენით გატარებული მოცულობის 80%-ზე მეტია. მილსადენის სიმძლავრე წელიწადში 67 მილიონ ტონა ნავთობს შეადგენს.

უკრაინული მედია ამ მოვლენას უკრაინის ომის გამო რუსეთსა და ყაზახეთს შორის ბოლო დროს წარმოქმნილ უთანხმოებას უკავშირებს. კერძოდ, "ევროპეისკაია პრავდას“ ამ კონტექსტში ყაზახეთის პრეზიდენტ კასიმ-ჟომარტ ტოკაევის განცხადება მოჰყავს, რომლის მიხედვითაც, ის ე.წ. დონეცკისა და ლუგანსკის სახალხო რესპუბლიკების დამოუკიდებლობას არ აღიარებს.

ამის პარალელუად ვრცელდება ინფორაცია, რომ უკრაინული მარცვლეულის ქურდობის გამო ყაზახეთმა შესაძლოა, კონტრაქტი გაუწყვიტოს და გემი ჩამოართვას რუსულ კომპანიას, რომელსაც ყაზახური საზღვაო ხომალდი, "ჟიბეკ ჟოლი“ აქვს ნაქირავები. გემი 4 ივლისს თურქეთში დააკავეს, რომელიც, უკრაინული მხარის მტკიცებით, მოპარული მარცვლეულით არის დატვირთული.

კონტრაქტის შესაძლო გაწყვეტაზე განცხადება მრეწველობისა და ინფრასტრუქტურის განვითარების მინისტრმა, კაირბეკ უსკენბაევმა მთავრობის სხდომაზე გააკეთა, რასაც ადგილობრივი სააგენტო, Liter.kz ავრცელებს. გააგრძელეთ კითხვა