რუსეთში გამოაქვეყნეს მუსიკოსების განახლებული "შავი სია" და ისინი რუსეთში უცხო ქვეყნის აგენტებად გამოაცხადეს - მათ შორის ორი ქართველია

რუსულ მედიაში გამოქვეყნდა ახალი სია იმ ვარსკლავების, რომელთა კონცერტებიც აკრძალულია რუსეთის ტერიტორიაზე. ჯერ კიდევ ომის დაწყებიდან რამდენიმე კვირაში პირველი სია გავრცელდა, სადაც ის შემსრულებლები მოხვდნენ, რომლემაც უკრაინაში რუსეთის მიერ დაწყებული ომი დაგმეს და ვლადიმერ პუტინს მხარდაჭერა არ გამოუცხადეს.

სიაში მოხვდნენ ის ადამიანებიც, რომლებმაც ჯერ კიდევ წლების წინ დონბასის ოკუპაცია დაგმეს. მათ შორის ზოგიერთმა ვარსკვლავმა ჯერ კიდევ მაშინ დატოვა რუსეთი და ახლა მის საზღვრებს გარეთ აგრძელებს მოღვაწეობას.

სია გრძელია და როგორც რუსული მედია წერს, მათ რუსმა პროდიუსერებმა კომენტარის გაკეთებაზე უარი უთხრეს. თუმცა ერთ-ერთმა მათგანმა, რომელმაც ანონიმურად დარჩენა ამჯობინა, ჟურნალისტებს განუცხადა, რომ სია, რომელიც მედიაში გამოქვეყნდა, ნამდვილია, თუმცა აქვე დასძინა, რომ სია განახლებადია და მას მუდმივად ავსებენ.

• რუსული მედია წერს, რომ სიაში მოხვედრილი შემსრულებლები აღიარებულები არიან რუსეთში უცხო ქვეყნის აგენტებად. ჩამონათვალში ორი ქართველის სახელსა და გვარსაც წაიკითხავთ, ესენი არიან ვალერი მელაძე და მუსია თოთიბაძე.

ქართველებისთვის ცნობილ შემსრულებლებიდან აგენტების ჩამონათვალში ასევე მოხვდნენ ჯგუფები: ДДТ (სოლისტი იური შევჩუკი); Машина времени (სოლისტი ანდრეი მაკარევიჩი); Аквариум-ი (სოლისტი ბორის გრებენშჩიკოვი); Би-2 (სოლისტები ალექსანდრე უმანი, იეგორ ბორტნიკი);, Несчастный случай, IC3PEAK, Литтл Биг-ი, Алоэ Вера, Каста, Louna და სხვა შემსრულებლები.

სიაში მოხვედრილი არტისტი ზემფირა უკვე რამდენიმე თვეა, რაც რუსეთში აღარ იმყოფება. მან ომის დაწყებიდან მალევე დატოვა რუსეთი და საფრანგეთში ცხოვრობს. რაც შეეხება ვალერი მელაძეს, ის ისევ რუსეთში ცხოვრობს. მართალია ეკრანზე გამოჩენა აუკრძალეს, თუმცა ის მაინც ახერხებს კორპორატიულ წვეულებებზე გამოსვლას.

რაც შეეხება მუსია თოთიბაძეს, ის რუსეთში მოღვაწე მხატვრის, კონსტანტინე თოთიბაძის ქალიშვილია. მხატვარი ძმების - კონსტანტინე და გოგი თოთიბაძეების შესახებ რუსული მედია ხშირად წერდა.

მუსიამ რუსეთში კარიერა 2013 წლიდან დაიწყო და ამჟამად საქართველოშია. 30 ივნისს მან "თბილისი ოუფენ ეარზე“ იმღერა.