ავტორი:

40-ზე მეტი ქვეყანა უკრაინის მიერ რუსეთის წინააღმდეგ ჰააგაში შეტანილი სარჩელის მიმართ მხარდაჭერას გამოხატავს - ხელმომწერთა შორის საქართველო არაა

40-ზე მეტი ქვეყანა უკრაინის მიერ რუსეთის წინააღმდეგ ჰააგაში შეტანილი სარჩელის მიმართ მხარდაჭერას გამოხატავს - ხელმომწერთა შორის საქართველო არაა

"კიდევ ერთხელ გამოვხატავთ მხარდაჭერას უკრაინის განაცხადის მიმართ, რომელიც ახორციელებს სამართალწარმოებას რუსეთის ფედერაციის წინააღმდეგ გაეროს საერთაშორისო სასამართლოში და ცდილობს დაადგინოს, რომ რუსეთს არ აქვს კანონიერი საფუძველი უკრაინაში სამხედრო მოქმედებების განსახორციელებლად გენოციდის დაუსაბუთებელი ბრალდებების საფუძველზე", - ამის შესახებ 40-ზე მეტი ქვეყნის ერთობლივ განცხადებაშია აღნიშნული.

განცხადების ხელმომწერი ქვეყნები რუსეთს უკრაინაში ომის დაუყოვნებლივ შეწყვეტისკენ მოუწოდებენ.

"კიდევ ერთხელ მოვუწოდებთ რუსეთს, დაუყოვნებლივ შეაჩეროს სამხედრო ოპერაციები უკრაინაში, როგორც ეს სასამართლომ 2022 წლის 16 მარტის დროებითი ზომების შესახებ ბრძანებაში დაავალა.

ვიმეორებთ, რომ რუსეთმა თავისი ქმედებების გამო პასუხი უნდა აგოს. ამასთან დაკავშირებით, მიგვაჩნია, რომ რუსეთის მიერ საერთაშორისო სამართლის დარღვევა წარმოადგენს მის საერთაშორისო პასუხისმგებლობას და რომ დანაკარგები და ზიანი, რომელიც უკრაინამ განიცადა რუსეთის მიერ საერთაშორისო სამართლის დარღვევის შედეგად, მოითხოვს რუსეთისგან სრულ და სასწრაფო კომპენსაციას“, - აღნიშნულია განცხადებაში.

უკრაინის მხარდამჭერ განცხადებას ხელს 40-ზე მეტი ქვეყნის წარმომადგენლები აწერენ, მათ შორის შეერთებული შტატების, გაერთიანებული სამეფოს, გერმანიის, საფრანგეთის, იტალიის, იაპონიის, ჩეხეთის, ლიეტუვის, ლატვიის, ესტონეთის, ესპანეთის, შვედეთის, მოლდოვის, ასევე ევროკავშირის.

აღსანიშნავია, რომ იმ ქვეყნებს შორის, რომლებიც უკრაინის მხარდასაჭერად საერთო განცხადებას ავრცელებენ, საქართველო არაა.