"ყველასთან ასე იყო - დავინახე და მივხვდი, ის ჩემი მომავალი ცოლი იქნებოდა“ - არესტოვიჩი სამ ცოლზე, შვილებზე და შემოსავალზე, რომელიც ომის შემდეგ გაეზარდა
უკრაინის პრეზიდენტის აპარატის მრჩეველი, ბლოგერი, მსახიობი, პოლიტიკური და სამხედრო მიმომხილველი - ეს ის რეგალიებია, რომელსაც ოლექსეი არესტოვიჩი ატარებს. ვიდეოში, რომელიც ZhVL-ის "იუთუბარხზე" გამოქვეყნდა, ოლექსეიმ გულახდილად ისაუბრა თავის ამჟამინდელ მეუღლე ანასტასიაზე, ასევე ორ ყოფილ ცოლთან ურთიერთობაზე და შვილებზე, რომელიც სამი ქორწინებიდან ჰყავს.
არესტოვიჩის თქმით, მესამე მეუღლე ანასტასია ფსიქოლოგიის კურსებზე გაიცნო. როდესაც დარბაზში მჯდომი ქალი დაინახა, იმავე დღეს მისი კაფეში დაპატიჟება გადაწყვიტა, სადაც გამოუცხადა, რომ მისი ცოლი გახდებოდა.
"ლექციის შემდეგ ყავაზე დავპატიჟე და ვუთხარი: - შენ ჩემი ცოლი გახდები, ჩვენ დავქორწინდებით - მეთქი. ყველასთან ასე იყო - დავინახე და მივხვდი, ის ჩემი მომავალი ცოლი იქნებოდა“, - ამბობს არესტოვიჩი.
მედია წერს, რომ უკრაინაში სექსსიმბოლოდ მიჩნეულ მამაკაცს ყოფილი ცოლებიც ერთი ნახვით შეუყვარდა. მისი თქმით კი, ყოფილ ცოლებთან კვლავაც კარგ ურთიერთობაშია, მეტიც, ქალები ერთმანეთთანაც მშვენივრად ურთიერთობენ.
არესტოვიჩს სამივე ცოლთან თითო შვილი ჰყავს. ორი ქალიშვილი - 18 და 11 წლის და 6 წლის ვაჟი . არესტოვიჩის თქმით, ცდილობს დიდი დრო დაუთმოს შვილებს და მისცეს მათ იმის უფლება, რაც უნდათ. ამბობს, რომ ბავშვებს აფუჭებს...
"ბავშვებს ძალიან ვაფუჭებ. ყველაფერის უფლებას ვაძლევ, რასაც ჩემი მრავალრიცხოვანი ცოლები არ იწონებენ. დიახ, სამივე ცოლისგან მყავს შვილი. ჩვენ კარგი ურთიერთობა გვაქვს", - განაცხადა არესტოვიჩმა.
მისი ცოლების შესახებ მედიაში თითქმის არაფერია ცნობილი, გარდა მისი ამჟამინდელი მეუღლის, ანასტასიასი.
წამყვანის კითხვაზე, თუ როგორ რეაგირებს მეუღლე მის პოპულარობაზე, ამბობს, რომ ეჭვიანობის საფუძველი არ არსებობს:
"ის მშვიდად რეაგირებს. ერთად ვხუმრობთ... ქალი ეჭვიანობს არა მაშინ, როცა სხვები უყურებენ მის ქმარს, არამედ როდესაც ის უყურებს სხვა ქალებს. "ინსტაგრამზე" მხოლოდ ჩემი ცოლი მყავს გამოწერილი..."
არესტოვიჩმა თავის შემოსავალზეც ისაუბრა. ომამდე თურმე თვეში 300 000 გრივნას (22 ათას ლარს) შოულობდა, ახლა კი მისი შემოსავალი გაცილებით მეტია. ასეთი შემოსავლის წყალობით სულ ცოტა ხუთ ოჯახს უზრუნველყოფს, თანაც ოცნება აისრულა - მანქანა იყიდა. მაგრამ ამბობს, რომ საკუთარი სახლი ჯერჯერობით არ აქვს.
უკრაინელი ქალების რჩეულის თქმით, ის "ლიკვიდაციისთვის“ განწირული ადამიანების სიაშია, ამიტომ მისთვის საშიშია ერთი საცხოვრებელი ადგილი და იძულებულია ბინები გამოიცვალოს.
შეგახსენებთ, ქართველებისთვის არესტოვიჩი კიდევ ერთმა ფაქტმა გახადა საინტერესო - როგორც ირკვევა, ის 1975 წლის 3 აგვისტოს კახეთში, დედოფლისწყაროში, სამხედრო გარნიზონში დაიბადა.