დამშრალი მდინარეები, წყლის დეფიციტი, განადგურებული მოსავალი - ევროპა გვალვით გამოწვეული პრობლემების წინაშე და კლიმატის ცვლილების მძიმე გავლენა

კლიმატის ცვლილება წლიდან წლამდე სულ უფრო თვალშისაცემი ხდება და სულ უფრო მეტად ვგრძნობთ კლიმატური თვალსაზრისით ახალ რეალობას, სადაც ეტაპობრივად შევდივართ. მაგალითად, წელს ევროპაში უპრეცენდენტო გვალვაა და ამის გამო, ზოგიერთ ქვეყანაში უკვე შეიქმნა წყალზე დეფიციტი.

გვალვამ ევროპის ქვეყნებში დააზიანა სახლები, ქარხნები, ფერმერები და მისი ნეგატიური გავლენა უკვე მთელ კონტინენტზე იგრძნობა.ექსპერტები ვარაუდობენ, რომ მოსალოდნელია მშრალი ზამთარი. მათივე თქმით, მშრალი ზამთარი და ცხელი ზაფხული იმას ნიშნავს, რომ წყლის დეფიციტი "ახალ ნორმად“ იქცევა.

• ევროპულმა ობსერვატორიამ გამოთვალა, რომ ევროკავშირის ტერიტორიის 45%-ზე გვალვის საგანგაშო მაჩვენებელი ივლისის შუა რიცხვებში იყო, ხოლო მათი 15 პროცენტი ე.წ. წითელ ზონაში შეიყვანეს და გააფრთხილეს "კრიტიკული სიტუაციის“ შესახებ.

ქვეყნები ცდილობენ შესაბამისი ზომების მიღებას. საფრანგეთის პრემიერ-მინისტრმა ელიზაბეთ ბერნმა გასულ კვირას კრიზისების ჯგუფი გააქტიურა, რომლის მიზანიც გვალვასთან დაკავშირებულ პრობლემებზე მუშაობაა. "გარდიანის“ ცნობით, მსგავსი გვალვა საფრანგეთში 1958 წლის შემდეგ არ ყოფილა.

საფრანგეთის 100 მუნიპალიტეტზე მეტს სასმელი წყლის პრობლემა შეექმნა და წყალი მათ სატვირთო მანქანებით მიეწოდებათ. "ჩვენ ამას უკვე უნდა შევეჩვიოთ, ადაპტაცია ახლა არა ვარიანტი, არამედ ვალდებულებაა“, - ამბობს საფრანგეთის გარემოს დაცვის მინისტრი, კრისტოფ ბეჩუ.

უკრაინაში რუსეთის შეჭრის შემდეგ, სურსათზე ფასების ზრდის ფონზე, საფრანგეთის სოფლის მეურნეობის მინისტრი აცხადებს, რომ სიმინდის მოსავალი სავარაუდოდ, გასულ წელთან შედარებით 18%-ით ნაკლები იქნება. ფერმერთა პროფკავშირებში კი ამბობენ, რომ გვალვის შედეგად პირუტყვის საკვების ნაკლებობამ შემოდგომასა და ზამთარში შესაძლოა, რძის მნიშვნელოვანი დეფიციტი გამოიწვიოს.

• ესპანეთში არასდროს ყოფილა წყლის მარაგი იმაზე ცოტა, როგორც ახლაა. "გარდიანი“ წერს, რომ წყლის მარაგი მცირდება, მოხმარების რაოდენობა კი მატულობს. მათივე ცნობით, წყლის აორთქლების მაჩვენებელი ბოლო 60 წელიწადში ესპანეთში ახლა ყველაზე მაღალია. ამ ზაფხულს ქვეყანაში მოსალოდნელ ნალექზე ორჯერ უფრო ნაკლები მოვიდა.

ზოგიერთ რეგიონში წყლის მოხმარებაზე შეზღუდვებია დაწესებული. თუ ნალექი მალე არ მოვა, შეზღუდვები კვლავ გაგრძელდება. ჯერჯერობით კი მეტეოროლოგები წვიმას არ პროგნოზირებენ.

"კლიმატის ცვლილებებთან დაკავშირებული კვლევები გვაფრთხილებს, რომ გვალვა იქნება უფრო ინტენსიური, ხშირი და ხანგრძლივი“, - ამბობს New Water Culture-ის დამფუძნებელი, ნურია ერნანდეს-მორა. მისივე თქმით, წყლის რესურსის შეზღუდვით გამოყენება ახალი ნორმა გახდება.

• 2022 წელი ყველაზე ცხელი და მშრალია იტალიისთვისაც. "აღარ ვიცი რა უნდა გავაკეთოთ იმისთვის, რომ კლიმატის საკითხი და არსებული კრიზისი პოლიტიკურ თემად იქცეს“, - ამბობს იტალიის მეტეოროლოგიური საზოგადოების პრეზიდენტი, ლუკა მერკალი.

მისივე თქმით, წლიდან წლამდე გვალვა იზრდება სიხშირითა და ინტენსივობით და ყველაფერი ისე ხდება, როგორც პროგნოზირებული იყო კლიმატის ცვლილების საკითხთან დაკავშირებულ 30 წლის წინანდელ ანგარიშში.

"რას ველოდებით იმისთვის რომ ეს საკითხი პრიორიტეტული გახდეს?“ - ამბობს ის.

კლიმატის კრიზისის ერთ-ერთი ყველაზე თვალსაჩინო გამოვლინებაა მდინარე პო, რომელიც ზოგიერთ ადგილას დამშრალია. წყლის დონე მდინარეში 2 მეტრით დაბალია. იტალიის ზოგიერთ რეგიონში მოსახლეობას წყალი სატვირთო მანქანებით მიეწოდება. წყლის დეფიციტის გამო, იტალიაში ბრინჯის მოსავლის 60%-ზე მეტი შესაძლოა განადგურდეს.

• წყლის დონე სახიფათო ნიშნულამდე დაეცა ასევე მდინარე რაინში, რომელიც ჩრდილო-დასავლეთ ევროპის სასიცოცხლო გზაა.

ეს გზა გამოიყენება ნავთობის, ქვანახშირისა და სხვა ნედლეულის ტრანსპორტირებისთვის და აკავშირებს გერმანიის ინდუსტრიულ კერას როტერდამთან და ანტვერპენის მთავარ პორტებთან.

დედაქალაქ ბერლინში არაერთ ტბაზე დაფიქსირდა წყლის დონის ვარდნა. ხეებს გერმანიაში საცურაო აუზის წყლით რწყავენ.

• გასულ კვირას ნიდერლანდების სამეფოში წყლის დეფიციტის შესახებ გამოაცხადეს,

თუმცა ხელისფლებას შეზღუდვები ჯერჯერობით არ დაუწესებია.

ისინი ხალხს სთხოვენ, რომ დაფიქრდნენ, სჭირდებათ თუ არა ავტომობილის გარეცხვა, ან საცურაო აუზის მთლიანად გავსება და მოუწოდებენ მოსახლეობას წყლის გონივრულად ხარჯვისკენ.