რუსეთის რაკეტამ დედამიწის ორბიტაზე ირანული თანამგზავრი გაიყვანა - რა დანიშნულებით გამოიყენებენ თანამგზავრს? - რუსეთ-ირანის ფარული და გაცხადებული მიზნები
რუსულმა რაკეტამ ორბიტაზე ირანული თანამგზავრი წარმატებით გაუშვა. რაკეტა სახელად "სოიუზი“ რუსეთის მიერ ყაზახეთში მდებარე კოსმოდრომიდან ბაიკონურიდან გაუშვეს.
გაშვებიდან დაახლოებით ცხრა წუთში მან ორბიტაზე მოათავსა ირანული თანამგზავრი სახელად "ხაიამი“, რომელსაც ეს სახელი ომარ ხაიამის პატივსაცემად უწოდეს.
- ირანში ოფიციალური პირები აცხადებენ, რომ მაღალი გარჩევადობის კამერით აღჭურვილი თანამგზავრი გამოყენებული იქნება გარემოს მონიტორინგისთვის, კვლევითი მიზნებისთვის და მასზე სრული კონტროლი ირანს ექნება.
ოფიციალური თეირანის ინფორმაციით, არცერთ სხვა ქვეყანას არ ექნება წვდომა თანამგზავრის მიერ შეგროვებულ ინფორმაციაზე და მას გამოიყენებენ მხოლოდ სამოქალაქო მიზნებისთვის. როგორც APnews წერს, არსებობს მოსაზრებები რომ შეიძლება რუსეთმა ის უკრაინის სათვალთვალოდ გამოიყენოს უკრაინაში მისი სამხედრო მოქმედებების ფონზე.
თუ თანამგზავრი წარმატებით იმუშავებს, ის ირანს შესაძლებლობას მისცემს თვალყური ადევნოს თავის მთავარ მტერს, ისრაელს და ახლო აღმოსავლეთის სხვა ქვეყნებს.
თანამგზავრის გაშვების კადრები ირანის სახელმწიფო ტელევიზიამ პირდაპირ ეთერში გაუშვა. ადგილობრივი მედიის ცნობით, ამ მოვლენას ქვეყნის სატელეკომუნიკაციო მინისტრი დაესწრო.
ცნობისთვის, ირანს აქვს როგორც სამოქალაქო, ასევე სამხედრო კოსმოსური პროგრამა, რაც აშშ-ში შფოთვის მიზეზია. აშშ-შ შიშობენ, რომ ირანმა ყოველივე შესაძლოა ბალისტიკური რაკეტების პროგრამისთვის გამოიყენოს. აღსანიშნავია, რომ ბოლო წლების განმავლობაში ირანმა რამდენჯერმე გაუშვა თანამგზავრი ორბიტაზე, თუმცა წარუმატებლად.