ჩინეთში ახალი Langya ჰენიპავირუსის ათობით შემთხვევა გამოვლინდა, რომელიც ადამიანზე, სავარაუდოდ, ცხოველიდან გადავიდა - რა სიმპტომები ახასიათებს და რამდენად სახიფათოა ის
მეცნიერები ლაპარაკობენ ახალ ვირუსზე, რომლის ათობით შემთხვევაც ჩინეთში 2018 წელს აღწერეს, ხოლო მისი იდენტიფიცირება მხოლოდ ახლა მოხერხდა. მკვლევრები მასზე თვალ-ყურის დევნებას აუცილებლად მიიჩნევენ.
საუბარია ახალ Langya ჰენიპავირუსზე (LayV), რომელიც პირველად ჩინეთის ჩრდილო-აღმოსავლეთ პროვინციებში, შანდონგსა და ჰენანში 2018 წლის ბოლოს აღმოაჩინეს, მაგრამ ვირუსის სახეობა ოფიციალურად მეცნიერებმა გასულ კვირას დაადგინეს.
მკვლევართა თქმით, ვირუსი, სავარაუდოდ, ცხოველებიდან ადამიანებზე გადავიდა და ახლა მეცნიერები მის გავრცელებას აკვირდებიან. ვირუსი 35 ინფიცირებული ადამიანის კვლევის შედეგად შეისწავლეს.
- ტესტი ჩაუტარეს ასევე გარეულ ცხოველებს და აღმოაჩინეს, რომ LayV ვირუსი ძირითადად ბიგასებრ ძუძუმწოვრებში გვხვდება. შეისწავლეს ასეთი 262 ცხოველი და მათ მეოთხედს აღნიშნული ვირუსი აღმოაჩნდა. ასევე LayV გამოვლინდა შემოწმებული შინაური თხის 2%-ში და ძაღლების 5%-ში.
ვირუსის შესახებ ინფორმაცია და პირველადი კვლევის შედეგი New England Journal of Medicine-ში გამოქვეყნდა, რომელშიც წერია, რომ ადამიანში ვირუსი გამოიხატა ისეთი სიმპტომებით, როგორებიცაა ცხელება, დაღლილობა, ხველა, მადის დაკარგვა და კუნთების ტკივილი. მეცნიერთა თქმით, ყველა ინფიცირებულ ადამიანს ჰქონდა ცხელება.
აღსანიშნავია, რომ ვირუსით გარდაცვალების შემთხვევა არ დაფიქსირებულა. მეცნიერები ამბობენ, რომ საჭირო არ არის პანიკა. მკვლევართა თქმით, ჯერ კიდევ უცნობია, ვრცელდება თუ არა ვირუსი ადამიანიდან ადამიანზე. 35 შემთხვევიდან უმეტესობა ფერმერები და მათი ოჯახის წევრები იყვნენ. მეცნიერები ამბობენ, რომ ეს ძალიან მცირე რაოდენობაა იმის დასადგენად გადადის, თუ არა ვირუსი ადამიანიდან ადამიანზე.
- მეცნიერებმა დაადგინეს, რომ LayV-ის გენომი ზოონოტიკური RNA ვირუსების კატეგორიისაა, რომელიც მოიცავს ჰენდრა და ნიპა ვირუსებს. ჰენდრა ვირუსი თავდაპირველად გაჩნდა ავსტრალიაში და ის ცხენებსა და ადამიანებში ვლინდება, ხოლო ნიპა ვირუსი აღმოსავლეთ აზიაშია გავრცელებული. ორივე მათგანი ზოგიერთ შემთხვევაში დაკავშირებული იყო სიკვდილიანობასთან.
აღსანიშნავია, რომ ინფექციური დაავადებების ექსპერტები დიდი ხანია აფრთხილებენ სამეცნიერო საზოგადოებას და მთელ მსოფლიოს, რომ კლიმატის ცვლილება, ბუნების განადგურება და კრიზისი, რომელიც ამ საკითხს უკავშირდება, გაზრდის ვირუსების გადაცემის რისკს ცხოველებიდან ადამიანებზე და ამისთვის მზად უნდა ვიყოთ.